पूर्वी बॉलिवूड चित्रपटांमध्ये काम केलेली सना खानने लग्नानंतर फिल्म इंडस्ट्री सोडली. तिने इस्लाम धर्मासाठी इंडस्ट्री सोडत असल्याचं म्हटलं होतं. पण, तरीही ती सोशल मीडियावर मात्र सक्रिय आहे. कोणत्या ना कोणत्या कारणाने ती कायम चर्चेत असते. ती पती अनसबरोबरचे तिचे फोटो आणि व्हिडीओ सोशल मीडियावर शेअर करत असते. अशातच आता अनसने त्याची व सनाची लव्हस्टोरी सांगितली आहे. लग्नापूर्वी सनाला बहीण मानत असल्याचा खुलासाही त्याने केला.
सना खान आणि मुफ्ती अनस सईद यांची लव्हस्टोरी खूपच फिल्मी आहे. अनस सईदने एक व्हिडीओ यूट्यूब चॅनेलवर शेअर केला आहे. त्यात त्याने सना आणि त्याची प्रेमकहाणी सांगितली आहे. व्हिडीओमध्ये अनसने खुलासा केला की, तो सनाशी पूर्वी बहिणीप्रमाणे वागायचा आणि तिला ‘बाजी’ म्हणजेच बहीण म्हणायचा. त्यावेळी त्याला कल्पनाही नव्हती की तो नंतर तिच्याशी लग्न करेल, असंही त्यात म्हटलं आहे.
अनसने सांगितले की, तो सनाला २०१७ मध्ये मक्का इथे भेटला होता. तिला भेटल्यावर त्याने तिला बहीण म्हणून हाक मारली. त्यावेळी त्याला कल्पनाही नव्हती की नंतर दोघेही लग्न करतील. अनसने सनाबद्दल खूप ऐकलं होतं. ती एक अभिनेत्री असली तरी ती दिवसातून पाच वेळा नमाज पठण करते, असं त्याने ऐकलं होतं. पहिल्या भेटीत काही खास घडलं नाही, पण या भेटीनंतर अनसने एका कॉमन फ्रेंडकडून तिचा नंबर घेतला आणि मेसेज केला, मात्र सनाने त्याला उत्तर दिले नाही. त्याने सनाला खूप वेळा मेसेज केले, पण ती लवकर रिप्लाय द्यायची नाही, अशातच तिने अनसला ब्लॉकही केलं. तिला जेव्हा अनसला काही विचारायचं असेल तेव्हा ती त्याला अनब्लॉक करायची, पण नंतर पुन्हा ब्लॉक करायची.
अंबानींच्या कार्यक्रमात सोन्याचा ड्रेस घालून पोहोचलेली ‘ती’ महिला आहे तरी कोण?
सुरुवातीला सना फारसं बोलायची नाही, पण अनस तिच्याशी बोलायचंच, याबद्दल ठाम होता. नंतर त्याने मौलानाला याबद्दल सांगितलं व तिने बोलावं, यासाठी तिचं मन वळवण्याचा आग्रह धरला. त्यानंतर सना अनसशी बोलू लागली. त्यानंतर मौलानाने सनाला अनसशी लग्न करण्याचा सल्लाही दिला. नंतर अनसने याचं रेकॉर्डिंग सनाला पाठवलं आणि त्या सगळ्या गोष्टी सांगायला आपणच मौलवीना विनंती केल्याची कबुली दिली. सुरुवातीला सनाने अनसचं प्रेम गांभीर्याने घेतलं नाही. त्यानंतर तीन वर्षांनी २०२० मध्ये सनाने अनसला लग्नासाठी होकार दिला. दोघांनी लग्न केल्यानंतर सनाने इंडस्ट्री सोडली. आता ते दोघेही एकत्र खूश असून लवकरच पालक होणार आहेत.
