लोकप्रिय बॉलीवूड अभिनेता संजय दत्त हा दिवंगत दिग्गज अभिनेते सुनील दत्त व अभिनेत्री नर्गिस यांचा मुलगा आहे. आज (१ जून रोजी) नर्गिस यांच्या जयंतीनिमित्त संजय दत्तने इन्स्टाग्रामवर भावुक पोस्ट शेअर केली आहे. संजयने दोन फोटो शेअर करत आईच्या आठवणींना उजाळा दिला आहे. प्रत्येक क्षणी तुझी आठवण येते, असं संजयने या पोस्टमध्ये म्हटलं आहे.
नर्गिस दत्त या भारतीय सिनेसृष्टीतील दिग्गज अभिनेत्री होत्या. आपल्या अभिनयाने व सौंदर्याने त्यांनी चित्रपट चाहत्यांच्या मनांवर राज्य केलं. नर्गिस दत्त यांचा जन्म १ जून १९२९ रोजी झाला होता. आज त्यांची ९५ वी जयंती आहे. त्यांच्या जयंतीनिमित्त त्यांचा मुलगा व अभिनेता संजय दत्तने इन्स्टाग्रामवर दोन फोटो शेअर करत भावुक पोस्ट लिहिली आहे. त्याच्या या पोस्टवर चाहते लाइक्स व कमेंट्सचा वर्षाव करत आहेत.
“वाढदिवसाच्या शुभेच्छा मम्मा, मला तुझी रोज आठवण येते, प्रत्येक मिनिटाला, प्रत्येक सेकंदाला, मला वाटतं की तू माझ्याबरोबर असतीस तर… तुला जसं वाटत होतं तसं आयुष्य मी जगत आहे आणि मला आशा आहे की मी तुला अभिमान वाटेल, असं काम केलं आहे. माझं तुझ्यावर खूप प्रेम आहे आणि आई तुझी खूप आठवण येते,” असं कॅप्शन संजयने दिलं आहे. संजयने शेअर केलेल्या दोन फोटोंपैकी एक फोटो त्याचा व आई नर्गिस यांचा आहे. तर दुसरा फोटो फक्त नर्गिस यांचा आहे.
संजय दत्तचं आईवर खूप प्रेम होतं. संजय अनेकदा भावुक पोस्ट शेअर करत असतो. मातृदिनानिमित्तही त्याने इन्स्टाग्रामवर फोटो शेअर करून भावुक पोस्ट लिहिली होती. नर्गिस दत्त यांच्या निधनाला आता ४३ वर्षे झाली आहेत. ३ मे १९८१ रोजी वयाच्या ५१ व्या वर्षी नर्गिस यांनी जगाचा निरोप घेतला होता.
आई-वडील झोपल्यावर मध्यरात्री त्यांच्या खोलीत जायची जान्हवी कपूर, कारण सांगत म्हणाली…
संजय दत्त व नर्गिस यांची नम्रता यांनी सांगितलेली आठवण
संजय दत्तला प्रिया आणि नम्रता अशा दोन बहिणी आहेत. पहिले अपत्य असल्याने संजय दत्त आई नर्गिस यांच्या जवळचा होता. संजयदेखील आईवर जिवापाड प्रेम करायचा. लहानपणी आई नर्गिस संजय दत्तची प्रत्येक मागणी पूर्ण करायची. कधी कधी आई संजयवर चिडायची. त्याला ओरडायची. इतकच नव्हे तर आईने एक दिवस त्याच्या दिशेने चप्पल देखील भिरकावली होती. पण तिचे संजयवर तितकेच प्रेमही होते, अशी आठवण संजय दत्तची बहीण नम्रता यांनी एका पुस्तकात सांगितली आहे.
