लक्ष्मण उतेकर दिग्दर्शित ‘छावा'(Chhaava) चित्रपटाचा ट्रेलर काही दिवसांपू्र्वीच प्रदर्शित झाला. चित्रपटाच्या ट्रेलरनेच धुमाकूळ घातल्याचे पाहायला मिळाले. अंगावर काटा आणणारा हा ट्रेलर पाहिल्यानंतर प्रेक्षकांनी कौतुकाचा वर्षाव केल्याचे पाहायला मिळाले. याबरोबरच, चित्रपटातील छत्रपती संभाजी महाराजांच्या लेझिम नृत्याच्या सीनवर अनेकांनी आक्षेप घेतला होता. त्यावरून वादही निर्माण झाले होते. चित्रपटातील वादग्रस्त लेझिम नृत्याचा सीन काढला जाणार असल्याचे दिग्दर्शक लक्ष्मण उतेकर यांनी स्पष्ट केले.चित्रपटात अभिनेता विकी कौशलने छत्रपती संभाजी महाराजांची भूमिका साकारली आहे. यामध्ये मराठमोळा अभिनेता संतोष जुवेकरसुद्धा महत्त्वाच्या भूमिकेत दिसत आहे. संतोषने या चित्रपटात रायाजी ही भूमिका साकारली आहे. आता त्याने एका मुलाखतीत, छावा चित्रपटातील राज्याभिषेकाच्या सीनबद्दल वक्तव्य केले आहे. या सीनवेळी नेमके काय वाटले होते, यावर त्याने भाष्य केले आहे.
सभा मंडप आणि ते सिंहासन बघून…
संतोष जुवेकरने नुकतीच राजश्री मराठीला मुलाखत दिली. या मुलाखतीत संतोष जुवेकरने राज्याभिषेकाच्या सीनवर म्हटले, “राज्याभिषेकाचा सीन ज्याप्रकारे सेट केलाय, तो पाहून मी वेडा झालो होतो. रायगडाचा जो सेट होता, जो राज्याभिषेकासाठी केला होता. तो सभा मंडप आणि ते सिंहासन बघून डोळ्यात पाणी आलं होतं. विकीची एन्ट्री होते आणि शिवगर्जना होते. धनुष्यबाण घेऊन विकी कौशलची एन्ट्री होते. अक्षरश: डोळ्यात पाणी आलं होतं. किरण कर्मरकर म्हणून आहे, तो बाजूला होता. त्याने मला जवळ घेतलं. विकीलासुद्धा तो सीन करताना ते सगळं जाणवलं होतं. कुठेतरी ती पॉवर त्या सेटवर होती. जो आदर, जे प्रेम, जी भावना, श्रद्धा राजांसाठी आहे, ती विकीकडे बघताना आमच्या नजरेत होती. शूटिंग करताना इतकं सगळं छान होतं, चांगलं वातावरण होतं. प्रत्येकाचं १०० टक्के समर्पण होतं”, असे म्हणत राज्याभिषेकाच्या सीनवेळी डोळ्यात पाणी आलं असे संतोष जुवेकरने म्हटले आहे.
राज्याभिषेकाच्या सीनबरोबरच संतोष जुवेकरने त्याची या चित्रपटात कशी निवड झाली, रायाजीच्या भूमिकेसाठी त्याने काही खास तयारी केली का, विकीबरोबर काम करण्याचा अनुभव आणि चित्रपटाचे दिग्दर्शक लक्ष्मण उतेकर यांच्याबरोबर कसं बॉण्डिंग आहे, यावर वक्तव्य केले आहे.
दरम्यान, विकी कौशलचा छावा हा सिनेमा लवकरच प्रेक्षकांच्या भेटीला येणार आहे. नुकताच या सिनेमाचा ट्रेलर लॉन्च झाला. या वेळी अभिनेत्री रश्मिका मंदाना, विकी कौशल खास अंदाजात दिसले. छत्रपती संभाजी महाराजांच्या आयुष्यावर बेतलेला हा चित्रपट प्रेक्षकांचे लक्ष वेधून घेत आहे. चित्रपटात संभाजी महाराजांची भूमिका अभिनेता विकी कौशलने साकारली आहे, तर संभाजी महाराजांची पत्नी महाराणी येसूबाईंची भूमिका अभिनेत्री रश्मिका मंदानाने साकारली आहे. लोकप्रिय अभिनेता अक्षय खन्नादेखील महत्त्वाच्या भूमिकेत दिसत आहे. हा चित्रपट १४ फेब्रुवारी २०२५ ला चित्रपटगृहात प्रदर्शित होणार आहे.
