बॉलिवूडमधील सुप्रसिद्ध चित्रपट दिग्दर्शक आणि अभिनेते सतीश कौशिक यांचं हृदयविकाराच्या झटक्याने ९ मार्च रोजी (गुरुवारी) निधन झालं. ते ६६ वर्षांचे होते. सतीश यांच्या निधनानंतर त्यांच्या कुटुंबावर दुःखाचा डोंगर कोसळला आहे. त्यांच्या मागे पत्नी व एक मुलगी असा परिवार आहे. मुलगी वंशिका ही १० वर्षांची आहे. तर सतीश यांची पत्नी शशी कौशिक यांचीही अवस्था बिकट झाली आहे.
आणखी वाचा – सतीश कौशिक यांच्या निधनापूर्वी नेमकं काय घडलं? मध्यरात्रीच रुग्णालयामध्ये जात होते पण…
सतीश यांच्या कुटुंबियांची नेमकी स्थिती काय आहे? याबाबत अभिनेत्री डेलनाज ईराणीने भाष्य केलं आहे. ‘न्यूज १८ हिंदी’बरोबर संवाद साधताना डेलनाजने संपूर्ण माहिती दिली. ती कौशिक कुटुंबियांच्या अगदी जवळ आहे. सतीश यांच्या निधनाची बातमी ऐकताच डेलनाजलाही मोठा दुःखद धक्का बसला होता.
डेलनाज म्हणाली, “९ मार्चला (गुरुवारी) सकाळी मी सतीश यांच्या पत्नी शशी कौशिक यांना फोन केला होता. तेव्हा त्यांचं रडणं थांबतच नव्हतं. शशी बोलण्याच्या मनस्थितीमध्येही नव्हत्या”. डेलनाज शशी कौशिक व सतीश यांची मुलगी वंशिकाच्या फार जवळ आहे. कौशिक कुटुंबियांबरोबर तिचं चांगलं नातं आहे.
आणखी वाचा – Video : १० वर्षांच्या लेकीसह सतीश कौशिक यांचा भन्नाट डान्स, ‘तो’ व्हिडीओ पाहून तुमच्याही डोळ्यांत येईल पाणी
सतीश कौशिक यांनी १९८५ मध्ये शशी कौशिक यांच्याशी विवाह केला. १९९६ मध्ये दोन वर्षाच्या मुलाला गमावल्यानंतर त्यांच्यावर दु:खाचा डोंगर कोसळला होता. त्यानंतर ५६व्या वर्षी सरोगसीच्या मदतीने त्यांना मुलगी झाली. त्यांची मुलगी वंशिका आता १० वर्षांची आहे. सतीश यांच्या कुटुंबियांना या कठीण प्रसंगी अधिकाधिक ताकद मिळो अशी प्रार्थना कलाकारांसह चाहतेमंडळी करत आहेत.
