Satish Kaushik Passed Away: हिंदी सिनेसृष्टीतील प्रसिद्ध चित्रपट दिग्दर्शक आणि अभिनेते सतीश कौशिक यांचं निधन झालं आहे. ६६ व्या वर्षी त्यांनी अखेरचा श्वास घेतला. त्यांना हृदयविकाराचा झटका आला होता. ज्येष्ठ अभिनेते अनुपम खेर यांनी ट्वीट करत सतीश कौशिक यांच्या निधनाची माहिती दिली. त्यांच्या निधनाने चित्रपटसृष्टीवर शोककळा पसरली आहे.
हृदयविकाराचा झटका येण्यापूर्वी एक दिवस आधीच सतीश कौशिक यांनी बॉलिवूडमधील सेलिब्रिटींसह होळी सेलिब्रेट केली होती. जावेद अख्तर यांच्या होळी पार्टीमध्ये ते सहभागी झाले होते. बॉलिवूड कलाकारांबरोबर रंगांची उधळण केल्यानंतर कुटुंबियांबरोबर होळी साजरी करण्यासाठी कौशिक दिल्लीला गेले होते. दिल्लीत आल्यानंतर सतिश कौशिक एका व्यावसायिकाच्या हार्महाऊसवर आयोजित केलेल्या होळी पार्टीत सहभागी झाले होते. हार्महाऊसवर असतानाचा रात्री त्यांती प्रकृती बिघडली होती. रात्री ११:३० वाजता कौशिक यांना अस्वस्थ वाटू लागलं होतं. त्यानंतर लगेचच त्यांना दिल्लीतील फॉर्टिस रुग्णालयात दाखल करण्यात आलं होत. परंतु, उपचारादरम्यान त्यांचा मृत्यू झाला.
हेही वाचा>>Video: ६६व्या वर्षीही नियमित व्यायाम करायचे सतीश कौशिक, निधनानंतर जीममधील व्हिडीओ व्हायरल
हेही पाहा>>Satish Kaushik Passed Away: पत्नी आणि १० वर्षांच्या मुलीसाठी किती संपत्ती सोडून गेले सतीश कौशिक?
सतिश कौशिक ८ मार्चला दिल्लीत आले होते. फार्महाऊसवरच त्यांची तब्येत बिघडल्याने तिथे नेमकं काय घडलं होतं? याचा तपास पोलीस करत आहेत. कौशिक यांना रुग्णालयात घेऊन गेलेल्या व्यक्तींच्या संपर्कातही पोलीस आहेत. त्यांची चौकशीही पोलिसांकडून केली जाणार आहे. कौशिक यांना रुग्णालयात नेण्यापूर्वी पोलिसांना कोणतीही माहिती देण्यात आली नव्हती. सतीश कौशिक यांचा मृत्यू झाल्यानंतर रुग्णालयाने याबाबत पोलिसांना कळवले.
सतीश कौशिक यांनी आजवर अनेक चित्रपटांतून प्रेक्षकांचं मनोरंजन केलं. १९८३ मध्ये ‘जाने भी दो यारो’ या चित्रपटाद्वारे त्यांनी चित्रपट सृष्टीत पदार्पण केलं. चित्रपटसृष्टीत पदार्पण करण्यापूर्वी त्यांनी अनेक नाटकांमध्येही काम केलं. ‘रूप की रानी’ चोरों का राजा, ‘प्रेम’, ‘हम आपके दिल में रहते है’ आणि ‘तेरे नाम’ यासारख्या चित्रपटांचे त्यांनी दिग्दर्शन केले आहे. ‘मिस्टर इंडिया’, ‘दीवाना मस्ताना’, ‘साजन चले ससुराल’सह या चित्रपटांतील त्यांनी साकारलेल्या भूमिका गाजल्या. कंगना रणौतचा ‘एमर्जन्सी’ हा त्यांचा शेवटचा चित्रपट ठरला. या चित्रपटात त्यांनी जगजीवन राम यांची भूमिका साकारली आहे.
