Satyaprem Ki Katha Box Office Collection Day 3: कियारा अडवाणी व कार्तिक आर्यन यांचा ‘सत्यप्रेम की कथा’ चित्रपट २९ जून रोजी प्रदर्शित झाला. या चित्रपटाला प्रेक्षकांचा चांगला प्रतिसाद मिळत आहे. बॉक्स ऑफिसवरही चित्रपट चांगली चांगली कमाई करत आहे. शुक्रवारी कमाईत घट झाल्यानंतर शनिवारी चित्रपटाच्या बॉक्स ऑफिस कलेक्शनमध्ये वाढ झाली आहे.
रिलीजच्या पहिल्या दिवशी म्हणजेच गुरुवारी चित्रपटाने ९.२५ कोटी रुपयांची कमाई केली होती. त्यानंतर दुसऱ्या दिवशी कमाईत घट झाली, शुक्रवारी चित्रपटाने फक्त ७ कोटी कमावले. पण, शनिवारी मात्र ६८ टक्के वाढीसह चित्रपटाने ११.७५ कोटी रुपयांचा गल्ला जमवला आहे. याबरोबरच चित्रपटाने एकूण २८ कोटी रुपयांची कमाई केली आहे.
कार्तिक-कियाराच्या ‘सत्यप्रेम की कथा’ चित्रपटाने पहिल्या दिवशी किती कमाई केली? जाणून घ्या
शनिवारी कलेक्शनमध्ये झालेली वाढ पाहता रविवारीही चित्रपट दमदार कमाई करेल, अशी शक्यता आहे. कियारा अडवाणी आणि कार्तिक आर्यन ही जोडी ‘भूल भुलैया २’ नंतर ‘सत्यप्रेम की कथा’मधून पुन्हा एकदा मोठ्या पडद्यावर परतली आहे. पण या चित्रपटाला ‘भूल भुलैया २’ सारखा प्रतिसाद मिळाला नाहीये. तुलनेने प्रतिसाद कमी असला तरी चित्रपट चांगली कमाई करत आहे.
रोमँटिक प्रेमकथा असलेल्या या चित्रपटाची निर्मिती साजिद नाडियादवाला यांनी केली आहे. चित्रपटाचं दिग्दर्शन मराठमोळ्या समीर विद्वान्सने केलं आहे. यामध्ये गजराज राव व सुप्रिया पाठक कार्तिकच्या पालकांच्या भूमिकेत दिसणार आहेत.
