“भारतीय पुरुष असभ्य…” प्रसिद्ध अभिनेत्री सयानी गुप्ताने व्यक्त केली खंत; वाईट अनुभव सांगत म्हणाली…

नुकतीच ती कपिल शर्माच्या ‘zwigato’ या चित्रपटात झळकली होती. आता मात्र ती एका वेगळ्याच कारणामुळे चर्चेत आली आहे. आपल्या विमानप्रवासादरम्यानचा अनुभव तिने तिच्या इंस्टाग्राम स्टोरीच्या माध्यमातून शेअर केला आहे, इतकंच नव्हे तर या पोस्टमध्ये तिने भारतातील सरसकट सगळ्याच पुरुषांबद्दल टिप्पणी केली आहे ज्यामुळे ती चर्चेत आली आहे.

आणखी वाचा : एका हातात हातोडा, दुसऱ्या हातात AK-47 अन्…मल्याळम सुपरस्टार मोहनलाल यांच्या ‘रामबाण’चे मोशन पोस्टर प्रदर्शित

आपल्या या स्टोरीमध्ये सयानी लिहिते, “विमानप्रवासादरम्यान प्रत्येक भारतीय पुरुषाचं वर्तन हे फारच असभ्य असतं. मोठमोठ्याने फोनवर बोलणे, खोकणे, शिंकणे हे फारच असभ्य वर्तन आहे. एका व्यक्तीच्या बॅगेचा फटका माझ्या चेहेऱ्यावर बसला अन् त्याला त्याची साधी जाणीवसुद्धा नव्हती. सगळे माझ्याकडेच पहात होते. माझी ही पोस्ट आत्ता जे वाचतायत तुमच्यापैकी बरेच लोक हे या प्रकारात मोडतात.” सयानीच्या या पोस्टमुळे सोशल मीडियावर तिला ट्रोल केलं जात आहे.

नेटकऱ्यांनी तिला यावर प्रतिक्रिया द्यायला सुरू केलं आहे. काहींनी सयानीच्या पोस्टवर सहमती दर्शवली तर काहींनी तिच्या इतर पोस्टवर कॉमेंट करत महिलांचं वर्तन कसं असतं असा खोचक उलट प्रश्न विचारला आहे. सयानी वेबसीरिजबरोबरच ‘मार्गारेट विथ अ स्ट्रॉ’, ‘पार्च्ड’, ‘फॅन’, ‘आर्टिकल १५’, ‘जॉली एलएलबी २’सारख्या चित्रपटातही काम केलं आहे. वेब विश्वातील ‘इन्साइड एज’ व ‘फोर मोअर शॉट्स प्लीज’ या दोन सीरिजमुळे सयानीला खरी ओळख मिळाली.