शाहरुख खान व दीपिका पदुकोणच्या ‘पठाण’ चित्रपटाची सध्या जोरदार चर्चा सुरू आहे. शाहरुखच्या जबरा फॅननी तर काही ठिकाणी संपूर्ण थिएटरचं बुक केलं आहे. चित्रपटाने प्रदर्शनापूर्वीच आगाऊ बुकिंगमध्ये कोट्यवधी रुपयांची कमाई केली असल्याचं बोललं जात आहे. अशामध्येच आता एक नवी माहिती समोर येत आहे.
शाहरुख मोठ्या ब्रेकनंतर रुपेरी पडद्यावर परतणार म्हटल्यावर चाहते भारावून गेले आहेत. शिवाय प्रदर्शनापूर्वीच ‘पठाण’चे शो हाऊसफुल झाले आहेत. पण आता नव्या माहितीनुसार ‘पठाण’ पाहण्यासाठी प्रेक्षक हजारो रुपये खर्च करत आहेत. जवळपास २००० ते २४०० रुपयांपर्यंत ‘पठाण’चं तिकिट विकलं जात आहे.
२० जानेवारीपासून चित्रपटाच्या ॲडव्हान्स बुकिंगला सुरुवात झाली. गुरुग्रामच्या एंबियंस मॉलमध्ये ‘पठाण’चं तिकिट २४००, २२०० व २००० रुपायला विकलं जात आहे. तिकिट इतकं महाग असूनही चित्रपटाचे संपूर्ण शो हाऊसफुल आहेत. शाहरुखला रुपेरी पडद्यावर पाहण्यासाठी प्रेक्षक चित्रपटाचं महागडं तिकिटही विकत घेत आहेत.
एबीपी न्यूजच्या वृत्तानुसार, दिल्ली येथील काही मल्टिप्लेक्समध्ये २१०० रुपयांपर्यंत ‘पठाण’चं तिकिट विकलं जात आहे. तर सकाळच्या शोच्या तिकिटांची किंमत जवळपास १००० रुपयांच्या घरात आहे. ‘पठाण’ने आतापर्यंत १४ कोटी रुपयांपेक्षा अधिक कमाई केली असल्याचं बोललं जात आहे.
शाहरुख व दीपिकाचा हा चित्रपट हिंदीसह तमिळ, तेलुगू भाषांमध्येही प्रदर्शित होणार आहे. या चित्रपटाला प्रेक्षकांचा प्रचंड प्रतिसाद मिळणार अशी चिन्ह दिसत आहेत. त्याचबरोबरीने जॉन अब्राहमलाही या चित्रपटामध्ये पाहण्यासाठी प्रेक्षक उत्सुक आहेत. २५ जानेवारील बहुचर्चित ‘पठाण’ बॉक्स ऑफिसवर दाखल होईल.