बॉलिवूडच्या किंग खान शाहरुख खानने त्याच्या ‘पठाण’ या चित्रपटातून बॉक्स ऑफिसवर धुमाकूळ घातला. बॉक्स ऑफिसवर कमाल दाखवत याने वेगवेगळे रेकॉर्ड मोडीत काढले आहेत. शाहरुखच्या चाहत्यांनी आणि एकूणच चित्रपट रसिकांनी या चित्रपटाला डोक्यावर घेतलं. प्रदर्शनाआधी हा चित्रपट वेगवेगळ्या कारणांमुळे वादाच्या भोवऱ्यात अडकला, पण त्यामुळे चित्रपटाचं फारसं नुकसान झालं नाही.
शाहरुखच्या या चित्रपटाने ‘बाहुबली’ आणि ‘केजीएफ २’सारख्या चित्रपटांना मागे टाकत बॉक्स ऑफिसवर जबरदस्त कमाई केली. भारतात ५४५ कोटी तर परदेशात तब्बल ३९६.०२ कोटी इतकी कमाई शाहरुखच्या ‘पठाण’ने केली. बॉक्स ऑफिसवर जरी तुफान कमाई या चित्रपटाने केली असली तरी बऱ्याच लोकांना हा चित्रपट काही फारसा आवडला नाही किंवा पटला नाही. या चित्रपटात खुद्द सलमान खानचाही एक जबरदस्त कॅमिओ लोकांना पाहायला मिळाला.
आता सलमानच्या या कॅमिओवरून आणि या चित्रपटातील त्या ट्रेन सिक्वेन्सवरून लोकांनी या चित्रपटाला पुन्हा ट्रोल करायला सुरुवात केली आहे. चित्रपटातील हा ट्रेनवरील चेसिंग सिक्वेन्स हा आंतरराष्ट्रीय अॅक्शन स्टार जॅकी चॅनच्या एका एनीमे शोमवरून चोरल्याची चर्चा होत आहे. खासकरून ट्रेनच्या टपावरील अॅक्शन चेस आणि ट्रेन दरीत कोसळतानाचा सीन हा जसाच्या तसा जॅकी चॅनच्या शोवरून जसाच्या तसा वापरला असल्याचं काही नेटकऱ्यांचं म्हणणं आहे. इतकंच नाही त्या शोमधील एक छोटीशी क्लिपही यूट्यूबवर उपलब्ध आहे.
सिद्धार्थ आनंद दिग्दर्शित आणि यशराज फिल्म्सच्या बॅनरखाली बनलेला ‘पठाण’ २५ जानेवारी रोजी जगभरात प्रदर्शित झाला होता. ‘पठाण’ने जगभरात १००० कोटींहून अधिक कमाई केली होती. या चित्रपटात दीपिका पदुकोण, जॉन अब्राहमच्याही महत्त्वाच्या भूमिका आहेत.
