आधी ‘पठाण’ अन् आता ‘जवान’ अशा दोन्ही चित्रपटांच्या माध्यमातून बॉक्स ऑफिसवर धुमाकूळ घालणारा किंग खान शाहरुख खान सध्या चांगलाच चर्चेत आहे. दोन्ही चित्रपटांनी १००० कोटींचा टप्पा पार केल्याने आता शाहरुखच्या आगामी ‘डंकी’ या चित्रपटाकडून असणाऱ्या अपेक्षा वाढल्या आहेत. ‘डंकी’च्या माध्यमातून शाहरुख खान व राजकुमार हिरानी हे प्रथमच एकत्र काम करणार आहेत.
‘डंकी’ची कथा ही आपल्या देश सोडून परदेशात स्थलांतरित झालेल्या लोकांवर बेतलेली असल्याची शक्यता वर्तवली जात आहे. नुकतंच ‘डंकी’चं पहिलं पोस्टर प्रदर्शित करण्यात आलं व प्रदर्शनाची तारीखही जाहीर करण्यात आली. तेव्हापासूनच याच्या टीझरची लोक आतुरतेने वाट बघत आहेत. शाहरुखच्या चाहत्यांनी फॅन-मेड टीझरसुद्धा सोशल मीडियावर शेअर करायला सुरुवात केली आहे.
आणखी वाचा : अजय देवगणच्या ‘सिंघम अगेन’चा रामायणाशी नेमका संबंध कसा? जाणून घ्या
आता याच्या टीझरबाबतीत एक नवी माहिती समोर येत आहे. ‘पिंकव्हीला’च्या रीपोर्टनुसार ‘डंकी’चा पहिला टीझर शाहरुखच्या वाढदिवशी म्हणजेच २ नोव्हेंबरला प्रदर्शित होणार आहे. युट्यूब आणि अन् सोशल मीडिया प्लॅटफॉर्मवर हा टीझर प्रदर्शित केला जाणार असल्याची शक्यता वर्तवली जात आहे. तर सलमान खानच्या ‘टायगर ३’बरोबरच चित्रपटगृहात ‘डंकी’चा पहिला टीझर दाखवला जाणार असल्याचं सांगितलं जात आहे. हा टीझर ५८ सेकंदांचा असेल असंही सांगितलं जात आहे.
‘डंकी’चा आणखी एक टीझर सेन्सॉरकडून पास करून घेण्यात आला आहे ज्याची लांबी १ मिनिटं ४९ सेकंद अशी आहे. या दोन टीझरनंतर याचा ट्रेलर लोकांच्या भेटीला येईल असं सांगितलं जात आहे. शाहरुखचे चाहते आणि सिनेप्रेमी या चित्रपटाची आतुरतेने वाट बघत आहेत. ‘डंकी’च्या बरोबरीनेच प्रभासचा ‘सालार’सुद्धा प्रदर्शित होणार आहे त्यामुळे बॉक्स ऑफिसवर जबरदस्त स्पर्धा पाहायला मिळणार आहे. ‘डंकी’मध्ये शाहरुखसह तापसी पन्नू, विकी कौशल यांच्या महत्त्वाच्या भूमिका असणार आहेत.
