रणबीर कपूरच्या ‘रामायण’चे चित्रीकरण लवकरच होणार सुरु, निर्माते मधू मंटेना यांनी घेतला प्रोजेक्टमधून काढता पाय

या चित्रपटात आधी सीतेच्या भूमिकेत आलिया भट्टसुद्धा दिसणार होती, पण काही कारणास्तव तिने या चित्रपटातून काढता पाय घेतला आहे. या चित्रपटाची सध्या जोरदार चर्चा आहे. रणबीर कपूर या चित्रपटासाठी चांगलीच मेहनत घेत आहे, इतकंच नव्हे तर तो यासाठी मांसाहार व मद्यपानही बंद करणार असल्याची चर्चा आहे. आता या चित्रपटाशी निगडीत एक नवा अपडेट समोर येत आहे.

मधु मंटेना या चित्रपटाची निर्मिती करणार होते. चित्रपटाच्या स्क्रिप्ट आणि स्केलवर ते नितीश यांच्याबरोबर सतत काम करत होता. मधू मंटेना हेच निर्माते आहेत ज्यांनी अल्लू अरविंदसोबत ‘गजनी’ची निर्मिती केली होती. मधू मंटेना अल्लू अरविंदसहच ‘रामायण’ची निर्मिती करणार होते. हा चित्रपट व्हीएफएक्सवर पूर्णपणे बेतलेला असल्याने त्यांनी जगातील सर्वोत्तम व्हीएफएक्स कंपनी DNEG चे मालक नमित मल्होत्रा ​​यांना चित्रपटाशी जोडले. नमित यांच्या कंपनीने कित्येक हॉलिवूड चित्रपटांसाठी तसेच रणबीर कपूरच्या ‘ब्रह्मास्त्र’साठी काम केलं आहे.

आणखी वाचा : Kajol Deepfake Video: रश्मिकापाठोपाठ काजोलचा ‘डिपफेक’ व्हिडीओ व्हायरल; कपडे बदलतानाची क्लिप चर्चेत

या चित्रपटाच्या कास्टिंगवरुन मधू आणि नमित यांच्यात बरेच मतभेद सुरू झाले, यानंतर आता समोर आलेल्या वृत्तानुसार मधू मंटेना यांनी या चित्रपटापासून निर्माता म्हणून वेगळं व्हायचा निर्णय घेतला आहे. सध्या नमित आणि त्यांच्या कंपनीच या चित्रपटावर काम करत असून नितेश तिवारी हे याचं दिग्दर्शन करणार आहेत. मीडिया रीपोर्टनुसार गेल्या सहा महिन्यांपासून या चित्रपटाच्या प्री-प्रोडक्शनवर काम सुरू आहे.

चित्रपटाचं कास्टिंगसुद्धा फायनल झालं असून रणबीर कपूर रामाच्या भूमिकेत, साई पल्लवी सीतेच्या भूमिकेत, केजीएफ स्टार यश हा रावण अन् सनी देओल हनुमान म्हणून चित्रपट दिसणार असल्याचं मीडिया रीपोर्टमधून स्पष्ट झालं आहे. तसेच या चित्रपटाचं चित्रीकरण मार्च २०२४ पासून सुरू होणार असल्याची शक्यता वर्तवली जात आहे. अद्याप याबद्दल अधिकृत घोषणा झालेली नसली तरी लवकरच निर्माते याबद्दल माहिती देतील असं सांगण्यात येत आहे.