श्रद्धा कपूर आणि राजकुमार राव यांच्या मुख्य भूमिका असलेला 'स्त्री २' हा चित्रपट बॉक्स ऑफिसवर धुमाकूळ घालताना दिसत आहे. चित्रपटगृहात गेला एक महिना हा सिनेमा टिकून आहे. या चित्रपटाला प्रदर्शित होऊन ३१ दिवस पूर्ण झाले आहेत. २०२४ या वर्षातील हा सर्वांत लोकप्रिय ठरलेला चित्रपट ठरला आहे. 'स्त्री २'ची बॉक्स ऑफिसवर ५४७.९५ कोटींची कमाई इंडस्ट्री ट्रॅकर सॅकनिल्कनुसार, 'स्त्री २'ने बॉक्स ऑफिसवर ५४७.९५ कोटी रुपयांची कमाई केली आहे. शनिवारी 'स्त्री २'ने ५.२५ कोटी रुपयांची कमाई केली. शुक्रवारी 'स्त्री २'च्या निर्मात्यांनी प्रेक्षकांसाठी बाय वन गेट वन (Buy One Get One) ही ऑफर दिली होती. त्याचा फायदा झाल्याचे पाहायला मिळाले. लवकरच हा चित्रपट ५५० कोटी रुपयांचा टप्पा पूर्ण करील, असा अंदाज व्यक्त केला जात आहे. महत्त्वाचे म्हणजे ‘स्त्री २’ या चित्रपटाने १९ दिवसांत ५०८ कोटी रुपयांची कमाई करीत रणबीर कपूरच्या 'अॅनिमल' चित्रपटाला मागे टाकले होते. संदीप रेड्डी वांगा यांच्या ‘अॅनिमल’ चित्रपटाने ५०५ कोटी रुपयांची कमाई केली होती. तसेच, श्रद्धा कपूरच्या ‘स्त्री २‘ने बॉक्स ऑफिसवर ५११ कोटी रुपयांची कमाई करणाऱ्य़ा एस. एस. राजामौली यांच्या ‘बाहुबली २ : द कनक्लुजन’ चित्रपटालाही मागे टाकले. शाहरुखच्या ‘पठाण’ चित्रपटाने ५२४.५३ कोटी रुपयांची कमाई केली होती; तर सनी देओलच्या ‘गदर २’ चित्रपटाने ५२५ कोटी रुपयांची कमाई केली होती. या दोन मोठ्या चित्रपटांनादेखील 'स्त्री २' मागे टाकत बॉक्स ऑफिसवर धुमाकूळ घातला आहे. आता हा चित्रपट बॉक्स ऑफिसवर कोणते नवीन रेकॉर्ड करणार हे पाहणे उत्सुकतेचे ठरणार आहे. हेही वाचा: ‘झोंबिवली’ ते ‘ट्रेन टू बुसान’, या वीकेंडला OTT वर पाहा झॉम्बीवर आधारित चित्रपट ‘स्त्री २’ हा चित्रपट अमर कौशिक यांनी दिग्दर्शित केला असून, श्रद्धा कपूर आणि राजकुमार राव त्यात मुख्य भूमिकांत दिसत आहेत. त्याबरोबरच पंकज त्रिपाठी, तमन्ना भाटिया, वरुण धवन, अक्षय कुमार, अपारशक्ती खुराना हे कलाकारदेखील महत्त्वाच्या भूमिकांत दिसत आहेत. दरम्यान, या आठवड्यात करीना कपूरची मुख्य भूमिका असलेला 'द बकिंगहॅम मर्डर्स' हा चित्रपट नुकताच प्रदर्शित झाला असून, या सिनेमाची फार चांगली सुरुवात झाली नसल्याचे पाहायला मिळाले. आता येत्या काळात हा चित्रपट बॉक्स ऑफिसवर किती कमाई करणार हे पाहणे महत्त्वाचे ठरणार आहे.
