हिंदी चित्रपटसृष्टीमधील विनोदी चित्रपटांच्या रांगेतील ‘गोलमाल’ या चित्रपटाच्या प्रत्येक भागाने प्रेक्षकांचे चांगलेच मनोरंजन केले आहे. या सीरिजमधील ‘गोलमाल’, ‘गोलमाल रिटर्न्स’, ‘गोलमाल ३’, ‘गोलमाल अगेन’ असे चार चित्रपट प्रदर्शित झाले. या चार चित्रपटांनंतर आता पुन्हा गोलमालच्या सिरीजमधील चित्रपट कधी येणार याची प्रेक्षक आतुरतेने वाट पाहत आहेत. नुकतेच अभिनेता श्रेयस तळपदेने याबाबत भाष्य केले आहे.
‘ई-टाइम्स’शी संवाद साधताना श्रेयस तळपदे म्हणाला, “खरे सांगायचे तर, केवळ चाहतेच नाही तर आम्हीही ‘गोलमाल-५’ची आतुरतेने वाट पाहत आहोत. रोहित आणि अजय यांनी कोरोना सुरू होण्यापूर्वीच चित्रपटाच्या पुढील भागाची घोषणा केली होती. दुर्दैवाने, कोविड आला आणि परिस्थिती बदलली. खरे सांगायचे तर, कथा काय आहे हे आम्हाला माहीत नाही. हे फक्त रोहितनाच माहीत आहे. त्यामुळे जेव्हा ते मला फोन करून सांगतील तेव्हाच मी चित्रपटाच्या कथेबद्दल बोलू शकेन. पण हो, आम्ही त्याची आतुरतेने वाट पाहत आहोत.”
हेही वाचा- “जणू ३ मृतदेहच…” पेट्रोल पंपावर २००० रुपयांच्या नोटा खर्च करणाऱ्या आर. माधवनची ‘ती’ पोस्ट चर्चेत
गोलमाल फन अनलिमिटेड, रोहित शेट्टीच्या गोलमाल मालिकेतील पहिला चित्रपट २००६ मध्ये प्रदर्शित झाला होता. या चित्रपटात शर्मन जोशी, तुषार कपूर, अर्शद वारसी आणि अजय देवगण मुख्य भूमिकांत होते. आणि यानंतर रोहित शेट्टीने त्याच्या चाहत्यांसाठी ‘गोलमाल रिटर्न्स’, ‘गोलमाल-३’ आणि ‘गोलमाल अगेन’ असे तीन सिक्वेल बनवले आहेत.
