अभिनेत्री श्वेता तिवारी आणि तिची लेक पलक तिवारी कायम कोणत्या ना कोणत्या कारणाने चर्चेत असतात. अनेकदा दोघींच्या व्हॅकेशनचे फोटो व्हायरल होत असतात. याशिवाय त्या एकमेकींच्या सोशल मीडिया पोस्टवर कमेंट्सही करत असतात. सध्या पलकच्या फोटोशूटवर श्वेता तिवारीने केलेली कमेंट चर्चेत आहे. मुख्य म्हणजे पलकने आईची कमेंट कॅप्शनला टाकत फोटो शेअर केले आहेत.
पलक तिवारी सलमान खानच्या ‘किसी का भाई किसी की जान’ या चित्रपटातून मोठ्या पडद्यावर पदार्पण करत आहे. हा चित्रपट २१ एप्रिल रोजी थिएटरमध्ये प्रदर्शित होणार आहे. पलक तिवारी देखील या चित्रपटाबद्दल खूप उत्साहित आहे आणि दररोज इंस्टाग्राम रील्स आणि फोटो शेअर करत आहे. पलक तिवारी सध्या तिच्या एका फोटोशूटमुळे चर्चेत आहे, पण तिच्या या फोटोंपेक्षा आई श्वेता तिवारीच्या कमेंटचीच जास्त चर्चा होत आहे.
पलक तिवारीने लेटेस्ट फोटोशूटचे काही फोटो आपल्या इंस्टाग्राम अकाउंटवर शेअर केले आहेत. यामध्ये ती ‘पुष्पा’ची सिग्नेचर स्टाइल करत हसताना दिसत आहे. चाहत्यांनी पलक तिवारीच्या स्टाइलचे कौतुक केले तर आई श्वेता तिवारीने मात्र तिच्या कपड्यांची खिल्ली उडवली आहे. “न्युटेला बनून का फिरत आहेस?” असं श्वेता तिवारीने पलकला म्हटलं. पलकने आईचा डायलॉग कॅप्शनमध्ये टाकत हे फोटो शेअर केले आहेत.
दरम्यान, पलकची आई श्वेता तिवारीने खिल्ली उडवली असली तरी नेटकऱ्यांना मात्र तिचे फोटो खूप आवडले आहेत. चाहते तिच्या फोटोंवर लाइक्स व कमेंट्सचा वर्षाव करत आहेत.
