२०२३ हे वर्ष हिंदी सिनेसृष्टीसाठी खूप खास राहिलं. करोनानंतर पूर्ण क्षमतेने चित्रपटगृहे सुरू झाली होती, मात्र प्रेक्षक चित्रपट पाहायला ओटीटी प्लॅटफॉर्म्सला पसंती देत होते. परिणामी अनेक चित्रपट थिएटर्समध्ये फ्लॉप झाले. पण २०२३ मध्ये प्रेक्षक चित्रपट पाहण्यासाठी थिएटरमध्ये आले आणि त्यांनी काही चित्रपटांना भरभरून प्रेम दिलं. पण काही बिग बजेट चित्रपट कथानक, व्हीएफएक्सचा अभाव, संवाद यामुळे फ्लॉप झाले. २०२३ या वर्षात एका अभिनेत्याने एक ब्लॉकबस्टर आणि एक सुपरफ्लॉप चित्रपट दिला. हा अभिनेता म्हणजे सिद्धांत कर्णिक होय.
सिद्धांत कर्णिकने प्रभास, क्रिती सेनॉन आणि सैफ अली खान यांच्या मुख्य भूमिका असलेल्या ‘आदिपुरुष’मध्ये विभीषणाची भूमिका साकारली होती. चित्रपटाला खराब व्हीएफ्स, वादग्रस्त संवाद, वेशभुषा यांमुळे प्रचंड ट्रोल करण्यात आलं होतं. अदाजे ६०० कोटींचे बजेट असलेल्या या चित्रपटाने जगभरात फक्त ३९३ कोटी रुपयांची कमाई केली होती. हा भारतीय चित्रपटांच्या इतिहासातील सर्वात मोठ्या फ्लॉप चित्रपटांपैकी एक ठरला.
अमिताभ बच्चन यांनी शेअर केला रेखांबरोबरचा ‘तो’ फोटो; म्हणाले, “या फोटोमागे खूप मोठी…”
‘अॅनिमल’मध्ये सिद्धांतने वरुण प्रताप मल्होत्रा नावाची रणबीर कपूरच्या भाऊजींची भूमिका साकारली होती. या चित्रपटावर पुरुषत्वाचा गौरव केल्याने काहींनी टीका केली, तर काहींनी या चित्रपटाचं खूप कौतुक केलं. हा चित्रपट २०२३ मधील एक ब्लॉकबस्टर ठरला. या चित्रपटाने जगभरात ९१५ कोटी रुपयांची कमाई केली. या चित्रपटाचं बजेट १०० कोटी होतं.
सिद्धांतने २००४ मध्ये टीव्ही शो रीमिक्समधून अभिनयात पदार्पण केलं होतं. त्याने ‘माही वे’, ‘रिश्ता डॉट कॉम’, ‘प्यार की ये एक कहानी’, ‘ये है आशिकी’ आणि ‘गुस्ताख दिल’ यांसारख्या अनेक मालिका केल्या. २०१५ मध्ये ‘एक था राजा एक थी रानी’ या मालिकेत त्याने राणा इंद्रवधन सिंग देवची प्रमुख भूमिका केली होती. याशिवाय सिद्धांत ‘ये मेरा इंडिया’, ‘लफंगे परिंदे’, ‘लिसन अमाया’, ‘थप्पड’, ‘ह्युमन’, ‘मॉडर्न लव्ह: मुंबई’, आणि ‘मेड इन हेवन २’ या चित्रपट व वेब सीरिजमध्ये झळकला.
सिद्धांत कर्णिकला प्रवासाची खूप आवड आहे, त्याने त्याच्या यूट्यूब चॅनेलवर अनेक व्लॉग शेअर केले आहेत. तो बाइकवरून भारतातील अनेक भागात फिरतो आणि तिथले अनुभव चाहत्यांबरोबर शेअर करतो. त्याने २०१६ मध्ये अभिनेत्री मेघा गुप्ताशी लग्न केलं होतं. पण लग्नाच्या तीन वर्षानंतर ते वेगळे राहू लागले आणि २०२० मध्ये त्यांचा घटस्फोट झाला.
