बॉलीवूडची ‘धकधक गर्ल’ माधुरी दीक्षित, इंडस्ट्रीत ‘अन्ना’ म्हणून ओळखला जाणारा अभिनेता सुनील शेट्टी आणि लोलो म्हणून लोकप्रिय झालेली अभिनेत्री करिश्मा कपूर या तिघांनी मिळून ‘डान्स दीवाने’च्या रंगमंचावर प्रचंड धमाल केल्याचं नुकत्याच समोर आलेल्या प्रोमो आणि व्हिडीओमधून पाहायला मिळत आहे. हे तिन्ही जण ९० च्या दशकातील आघाडीचे कलाकार म्हणून ओळखले जातात. या तिघांची अनेक वर्षांनी ‘डान्स दीवाने’ कार्यक्रमामुळे पुन्हा एकदा एकत्र भेट झाली.
१९९६ मध्ये ‘कृष्णा’ चित्रपट प्रेक्षकांच्या भेटीला आला होता. यामध्ये करिश्मा कपूर आणि सुनील शेट्टी यांच्यावर चित्रित झालेलं “झांझरिया…” हे गाणं प्रेक्षकांमध्ये प्रचंड लोकप्रिय झालं होतं. अभिजीत भट्टाचार्य यांनी हे गाणं गायलं होतं. आता २८ वर्षांनी पुन्हा एकदा याच गाण्यावर करिश्मा व सुनीलने जबरदस्त डान्स केला आहे.
“झांझरिया…” गाण्याला आता २८ वर्षे पूर्ण झाली आहेत. ९० च्या दशकात हे गाणं प्रचंड लोकप्रिय झालं होतं. ‘डान्स दीवाने’च्या मंचावर करिश्मा आणि सुनीलला एकत्र डान्स करत असल्याचं पाहून माधुरी दीक्षितला देखील शिट्ट्या वाजवण्याचा मोह आवरता आला नाही. तिने दोघांंचं भरभरून कौतुक करत शिट्ट्या वाजवल्या. दोन्ही सहकलाकारांना एकत्र थिरकताना पाहून तिने मोठ्या आनंदाने प्रोत्साहन दिलं.
‘डान्स दीवाने’मध्ये प्रेक्षकांना सुनील-करिश्माच्या “झांझरिया…” गाण्याबरोबरच माधुरी आणि करिश्माचा ‘दिल तो पागल हैं’ चित्रपटातील डान्स फेस ऑफ देखील पुन्हा एकदा पाहण्याची संधी मिळणार आहे. कलर्स वाहिनीवर रात्री ९.३० वाजता येत्या शनिवारी आणि रविवार हा कार्यक्रम प्रेक्षकांना पाहायला मिळेल. सध्या नेटकरी या व्हिडीओवर कौतुकाचा वर्षाव करत आहेत.
“सुपरहिट जोडी”, “करिश्मा आहे तशीच आहे”, “एव्हरग्रीन साँग”, “सुनील शेट्टी आणि करिश्मा कपूर मस्तच!” अशा कमेंट्स नेटकऱ्यांनी या व्हिडीओवर केल्या आहे.
