गेल्या काही महिन्यांपासून सनी देओल खूप चर्चेत आहे. आधी मुलाचं राजेशाही लग्न, नंतर त्याचा आलेला ‘गदर २’ चित्रपट आणि आता धाकट्या मुलाचं बॉलीवूड पदार्पण ही त्यामागची कारणं आहे. सनीच्या ‘गदर २’ ने बॉक्स ऑफिस रेकॉर्ड मोडत नवे विक्रम रचले. आता त्याने दारूबद्दल केलेल्या विधानाची जोरदार चर्चा आहे. दारू लोक का पितात? असा प्रश्न त्याने विचारला आहे.
‘माशाबेल इंडिया’ला दिलेल्या मुलाखतीत, मुलगा राजवीरचा पहिला चित्रपट ‘दोनों’चे प्रमोशन करताना सनीने दारू पिण्याबद्दल त्याचं मत व्यक्त केलं. “असं नाही की मी प्रयत्न केला नाही… मी इंग्लंडला गेल्यावर सोसायटीचा एक भाग होण्याचा प्रयत्न केला पण दारूचं मला काही कळलंच नाही. दारू इतकी कडू आहे व त्याचा वास इतका घाणेरडा आहे, दारू प्यायल्याने डोकं दुखतं, मग लोक दारू का पितात? खरं तर ती पिण्याचा काहीच फायदा नाही, त्यामुळे मी पुन्हा प्रयत्न केला नाही,” असं सनी म्हणाला.
सनीचा धाकटा मुलगा राजवीर याने एक प्रसंग सांगितला. राजवीर एक बिअर प्यायला होता पण सनीला वाटलं की मुलगा नशेत घरी आला आहे. “जेव्हा मी पहिल्यांदा फक्त एकच बिअर घेतली होती, तेव्हा बाबाला कळलं होतं. बाबा झोपले होते आणि मी माझा चार्जर त्यांच्या पलंगाच्या शेजारी ठेवला होता तो घ्यायला मी गेलो होतो. पण मी चुकून त्यांचा चार्जर घेतला आणि त्यांना वाटलं की मी नशेत आहे. त्यांना माझ्याजवळ बिअरचा वास येत होता,” असं राजवीरने सांगितलं.
“माझ्या दोन्ही मुलांनी कधी दारू प्यायला सुरुवात केली ते मला कळलंच नाही. माझ्या घरात नेहमीच असंच होतं. माझ्या वडिलांना माझ्याबद्दलच्या अनेक गोष्टी माहित नव्हत्या. मी एका शिस्तप्रिय कुटुंबातून आलो आहे पण मला जे काही करायचे होते ते मी केले. मात्र मला दारू कधीच आवडली नाही,” असं सनी देओल म्हणाला.
