सध्या चित्रपटगृहांमध्ये ‘गदर २’ या चित्रपटाने धुमाकूळ घातला आहे. सनी देओल व अमीषा पटेलचा हा चित्रपट ११ ऑगस्ट रोजी प्रदर्शित झाल्यापासून तुफान कमाई करत आहे. या चित्रपटाने कमाईच्या बाबतीत ‘बाहुबली’चा रेकॉर्डही मोडला आहे. पहिल्या व दुसऱ्या दिवसात ‘गदर २’ ने जवळपास ८३ कोटींचा व्यवसाय केला. ‘गदर २’ चे शो हाऊसफुल्ल होत आहेत. चित्रपटाला प्रेक्षकांचा खूपच चांगला प्रतिसाद मिळत आहे.
तिसऱ्या दिवशी गदर २ ने ५० कोटींचा गल्ला जमवला अन् अवघ्या तीन दिवसांत या चित्रपटाने १३३.१८ कोटींची कमाई करत एक वेगळा रेकॉर्ड बनवला आहे. यानंतर आलेल्या लॉन्ग वीकेंडमुळे तर चित्रपटाच्या कमाईत आणखीनच भर पडल्याचं स्पष्ट झालं आहे. १५ ऑगस्ट म्हणजेच स्वातंत्र्यदिनानिमित्त या ‘गदर २’साठी लोकांनी बॉक्स ऑफिसवर अधिक गर्दी केल्याचं चित्र दिसलं.
आणखी वाचा : कोण आहेत सध्याचे सर्वाधिक मानधन घेणारे चित्रपट लेखक? ८१ व्या वर्षीसुद्धा घेतात ‘इतके’ कोटी
‘सॅकनिक’च्या रीपोर्टनुसार ‘गदर २’ने १५ ऑगस्टला ५५ कोटींचा व्यवसाय केला आहे. ‘गदर २’च्या कामईतला आजवरचा हा एका दिवसाचा सर्वाधिक आकडा आहे. पाचही दिवसांत ‘गदर २’ने २२९ कोटींच्या आसपास कमाई भारतात केली आहे. लवकरच हा चित्रपट ‘द केरला स्टोरी’चा अन् शाहरुख खानच्या ‘पठाण’लाही मागे टाकणार असल्याची शक्यता वर्तवली जात आहे.
सनी देओलचा ‘गदर २’ हा चित्रपट त्याच्या करिअरमधील सर्वात जास्त कमाई करणारा चित्रपट ठरला आहे. अनिल शर्मा दिग्दर्शित या चित्रपटात त्यांचा मुलगा उत्कर्ष शर्माचीही मुख्य भूमिका आहे. या चित्रपटाच्या माध्यमातून अनिल शर्मा यांनी पुन्हा उत्कर्षला चित्रपटांमध्ये नाव कामावण्याची संधी दिली आहे. २२ वर्षांपूर्वी आलेल्या ‘गदर एक प्रेम कथा’ या चित्रपटानेही बॉक्स ऑफिसवर ७६.६५ कोटींची रेकॉर्ड ब्रेकिंग कमाई केली होती.
