बॉलिवूडचा भाईजान सलमान खान तब्बल ३ वर्षांनी ‘किसी का भाई किसी की जान’ या चित्रपटातून मोठ्या पडद्यावर कमबॅक करणार आहे. नुकताच या चित्रपटाचा ट्रेलर प्रदर्शित झाला. यातील गाणीसुद्धा प्रेक्षकांच्या पसंतीस उतरली आहेत. या चित्रपटाच्या ट्रेलरला मिश्र प्रतिक्रिया मिळाल्या आहेत. या चित्रपटाच्या ट्रेलरबद्दल आणि त्यातील सलमानच्या भूमिकेबद्दल नुकतंच सिनेतज्ञ आणि समीक्षक तरण आदर्श यांनी भाष्य केलं आहे.
‘बॉलिवूड हंगामा’ला दिलेल्या मुलाखतीमध्ये तरण आदर्श यांनी सलमान खानच्या ‘किसी का भाई किसी की जान’च्या ट्रेलरवर परखड मत व्यक्त केलं आहे. याबरोबरच सलमानची कोणती गोष्ट त्यांना खटकते आणि कोणती गोष्ट त्यांना आवडते याबद्दलही त्यांनी भाष्य केलं आहे. या मुलाखतीतून सलमानच्या चित्रपटाबद्दल भाष्य करताना त्यांनी सलमानला एक चांगला सल्लादेखील दिला आहे.
आणखी वाचा : रणवीर सिंगच्या अभिनय कारकिर्दीला लागणार ब्रेक; YRF ने सोडली साथ, अभिनेत्यासह चित्रपट करण्यास नकार
मुलाखतीदरम्यान तरण आदर्श म्हणाले, “किसी का भाई किसी की जानच्या ट्रेलरविषयी माझ्या मिश्र प्रतिक्रिया आहेत. हे मी ऑन रेकॉर्ड बोलतोय की रोमान्स करणारा सलमान खान मला आवडत नाही. तो अॅक्शनमध्ये जास्त शोभून दिसतो. सलमानचे ‘बजरंगी भाईजान’, ‘सुलतान’ हे चित्रपट मला प्रचंड आवडतात कारण त्यात सलमानची एक वेगळी बाजू बघायला मिळते, पण रोमान्समध्ये सलमान फिका पडतो हे नक्की. त्याने योग्य चित्रपट आणि दिग्दर्शक निवडायला हवेत असं मला वाटतं.”
आणखी वाचा : गाण्यातील महिलांविषयी अपमानास्पद शब्दांबद्दल हनी सिंगचं स्पष्टीकरण; रॅपर म्हणतो, “असं असेल तर…”
सलमानबद्दल बोलताना त्यांनी ‘किसी का भाई किसी की जान’च्या बॉस ऑफिस नंबर्सबद्दलही भाष्य केलं. हा चित्रपट बॉक्स ऑफिसवर चांगलीच कमाई करेल अशी आशा त्यांनी व्यक्त केली. ‘किसी का भाई किसी की जान’ या चित्रपटात सलमानसह पूजा हेगडे, वेंकटेश, शेहनाज गिल, पलक तिवारी, जगपती बाबू हे कलाकार प्रमुख भूमिकांमध्ये आहेत. हा चित्रपट २१ एप्रिलला ईदच्या मुहूर्तावर प्रदर्शित होणार आहे. सलमानचे चाहते या चित्रपटाची आतुरतेने वाट बघत आहेत.
