‘द केरला स्टोरी’ हा चित्रपट ५ मे रोजी चित्रपटगृहांमध्ये प्रदर्शित झाला. या चित्रपटाचा ट्रेलर प्रदर्शित झाल्यापासून या चित्रपटावरून बराच वाद सुरू होता. त्यामुळे या चित्रपटाला प्रेक्षकांचा कसा प्रतिसाद मिळतो, याकडे सर्वांचं लक्ष लागलं होतं. पण हा चित्रपट चित्रपटगृहांमध्ये खूप चांगली कामगिरी करताना दिसत आहे. हा चित्रपट लवकरच कमाईचा १०० कोटींचा आकडा गाठणार आहे.
या चित्रपटात ३२ हजार महिलांच्या धर्मांतराचा दावा खोटा आहे, हा एक प्रोपगंडा चित्रपट आहे, असं म्हणत अनेक राजकीय पक्ष आणि संघटनांनी चित्रपटाच्या प्रदर्शनावर बंदी घालण्याची मागणी केली होती. पण तसं जरी असलं तरीही या चित्रपटाने पहिल्याच आठवड्यात मोठी कमाई केली आहे.
मीडिया रिपोर्ट्सनुसार, या चित्रपटाने प्रदर्शनाच्या सातव्या दिवशी १२ कोटींचा गल्ला जमवला. तर या चित्रपटाने सहाव्या दिवशीदेखील १२ कोटींची कमाई केली होती. त्यामुळे गेल्या दोन दिवसांत या कमाईच्या आकडेवारीमध्ये फरक पडलेला नाही. तर त्याआधी या चित्रपटाने पहिल्या दिवशी ८.३ कोटी, दुसऱ्या दिवशी ११.१२ कोटी, तिसऱ्या दिवशी १६.४० कोटी, चौथ्या दिवशी १०.७ कोटी आणि पाचव्या दिवशी ११.१४ कोटींची कमाई केली होती. आतापर्यंत या चित्रपटाची एकूण कमाई ही ८० कोटींपेक्षा अधिक झाली आहे. त्यामुळे आता येत्या एक-दोन दिवसांत हा चित्रपट १०० कोटींचा टप्पा पार करेल असा सर्वांना विश्वास वाटत आहे.
सुदीप्तो सेन यांनी या चित्रपटाचं दिग्दर्शन केलं असून या चित्रपटात अदा शर्मा, योगिता बिहानी, सिद्धी इदनानी आणि सोनिया बालानी या अभिनेत्री प्रमुख भूमिकांत आहेत.
