विवेक अग्निहोत्री दिग्दर्शित ‘द व्हॅक्सिन वॉर’ हा चित्रपट सध्या चित्रपटगृहांमध्ये प्रदर्शित झाला आहे. अनुपम खेर, नाना पाटेकर आणि पल्लवी जोशी यांसारख्या कलाकारांची भूमिका असलेल्या या चित्रपटाला प्रेक्षकांचा मिश्र प्रतिसाद मिळत आहे. यादरम्यान, ‘द केरळ स्टोरी’ फेम अभिनेत्री अदा शर्मासुद्धा या चित्रपटामुळे चर्चेत आली आहे.
नुकतंच जेव्हा अदाला या चित्रपटाबद्दल विचारण्यात आले तेव्हा तिने यावर कोणतीही प्रतिक्रिया देण्यास नकार दिला आणि असे करण्यामागील कारणही सांगितले. विवेक अग्निहोत्री यांनी ‘द केरला स्टोरी’ या चित्रपटाचं तोंडभरून कौतुक केलं होतं. त्यावेळी बऱ्याच लोकांनी ‘द केरला स्टोरी’ला प्रचंड विरोधही केला होता.
आता ‘द व्हॅक्सिन वॉर’दरम्यानही काहीशी अशीच स्थिति समोर असताना अदाने यावर प्रतिक्रिय द्यायचं टाळलं आहे. मीडियाशी संवाद साधतान ती म्हणाली, “मला ‘द केरला स्टोरी’ नंतर समजले की चित्रपट पाहिल्याशिवाय कोणतीही टिप्पणी करू नये, कारण माझ्या चित्रपटाबाबतही असेच घडले होते, टीझर पाहिल्यानंतर लोकांनी खूप विरोध केला होता. त्यामुळे हा चित्रपट पाहिल्याशिवाय मी काहीच भाष्य करणार नाही.”
अद्याप अदाने चित्रपट पाहिला नसल्याने प्रतिक्रिया देण्यास नकार दिल्याचं स्पष्ट झालं आहे. काही महिन्यांपूर्वी आलेल्या ‘द केरला स्टोरी’ने बॉक्स ऑफिसवर इतिहास रचला होता. तर विवेक अग्निहोत्री यांच्या ‘द व्हॅक्सिन वॉर’कडूनही लोकांना बऱ्याच अपेक्षा होत्या, परंतु चित्रपटाला म्हणावा तसा लोकांचा प्रतिसाद मिळाला नसल्याने ‘द व्हॅक्सिन वॉर’ची एवढी चर्चा आपल्याला पाहायला मिळत नाही.
