सध्या बॉलीवूड चित्रपटांची चांगलीच रेलचेल आहे. अनेक बड्या बॉलीवूड चित्रपटांच्या प्रदर्शनाच्या तारखा क्लॅश होताना दिसत आहेत. त्यामुळे ही टक्कर टाळण्यासाठी अनेक निर्मात्यांनी त्यांचा चित्रपट पुढे ढकलण्याचा निर्णय घेतला आहे. आता यात वरुण धवनही सामील झाला आहे.
वरुण धवन आणि करण जोहर यांच्यात गुरु-शिष्याचं नातं आहे. करण जोहरने त्याच्या ‘स्टुडन्ट ऑफ द इयर’ या चित्रपटातून वरुण धवनला ब्रेक दिला. हा चित्रपट सुपरहिट ठरला. आतापर्यंत कधीही वरुणने करणच मन दुखावलेलं नाही. अशातच आता त्यांनी करण जोहरसाठी एक मोठा निर्णय घेतला आहे.
वरुण धवन गेले काही दिवस त्याच्या ‘बवाल’ या चित्रपटामुळे चर्चेत आहे. या चित्रपटाच्या निमित्ताने पहिल्यांदाच तो आणि अभिनेत्री जान्हवी कपूर स्क्रीन शेअर करताना दिसणार आहेत. हा चित्रपट २७ जुलै रोजी ‘ॲमेझॉन प्राईम’वर प्रदर्शित होणार होता. पण आता या चित्रपटाच्या प्रदर्शनाची तारीख बदलण्यात आली आहे. आता हा चित्रपट २७ जुलै च्या ऐवजी २१ जुलै रोजी ओटीटीवर प्रदर्शित होईल. याचे मुख्य कारण म्हणजे २८ जुलै रोजी करण जोहरचा ‘रॉकी और रानी की प्रेम कहानी’ हा चित्रपट चित्रपटगृहात प्रदर्शित होणार आहे. या दोन चित्रपटांमध्ये स्पर्धा निर्माण होऊ नये यासाठी हा निर्णय घेण्यात आला आहे.
हेही वाचा : “तू काहीही कर पण ‘हे’ नको…” रणवीर सिंगचा वरुण धवनला मोलाचा सल्ला
मीडिया रिपोर्टनुसार या चित्रपटाच्या प्रदर्शनाची तारीख बदलण्यासाठी वरुण धवनने चित्रपटाच्या टीमला तयार केलं. त्यामुळे आता या दोन चित्रपटांमध्ये होणारी टक्कर थांबवण्यात आली आहे. तर आता अखेरीस वरून धवनचा ‘बवाल’ हा चित्रपट २१ जुलैला आणि करण जोहरचा ‘रॉकी और रानी की प्रेम कहानी’ हा चित्रपट २८ जुलैला प्रदर्शित होईल.
