दिग्गज बॉलीवूड अभिनेत्री मुमताज यांचे पाकिस्तानी कलाकारांबरोबरचे काही फोटो सोशल मीडियावर चर्चेत आहेत. मुमताज पाकिस्तानला गेल्या होत्या, तिथे काढलेले फोटो व व्हिडीओ त्यांनी इन्स्टाग्रामवर शेअर केले होते. गुलाम अली, राहत फतेह अली खान, फवाद खान यांसारख्या अनेक पाकिस्तानी कलाकारांबरोबरचे फोटो त्यांनी पोस्ट केले होते. आता मुमताज यांनी पाकिस्तानी कलाकारांवरील भारतातील बंदी हटवली पाहिजे, त्यांना इथे येऊन आपलं कौशल्य दाखवण्याची संधी मिळाली पाहिजे, असं म्हटलं आहे.
‘टाईम्स नाऊ’च्या वृत्तानुसार, मुमताज यांनी पाकिस्तान दौऱ्याबद्दल आनंद व्यक्त केला आहे. “मला खूप प्रेम मिळालं, खूप लंच आणि डिनर आणि खूप भेटवस्तू मिळाल्या. मी भारावून गेले होते. मला माहित नव्हतं की तिथले लोक माझ्यावर इतकं प्रेम करतात जितकं इथले लोक करतात. लोक मला रस्त्यावर जाताना ओळखायचे, कारण मी स्वतःला मेंटेन केलं आहे. मी अजूनही आधी दिसायचे तीच मुमताज दिसते. मी फार बदलले नाही. मी जिथे जाते तिथे लोक मला ओळखतात. ही ईश्वराची कृपा आहे,” असं त्या म्हणाल्या.
राहत फतेह अली खान आणि फवाद खान यांनी खूप चांगल्या रितीने स्वागत केलं व आदरातिथ्य केलं, असं मुमताज यांनी सांगितलं. “आम्ही भेटलो तेव्हा राहत साहेबांची प्रकृती बरी नव्हती, पण त्यांना माझ्यासाठी गाणं गाण्यास सांगितल्यावर त्यांनी गायलं. तेव्हा मला वाटलं की मी अजूनही तीच मुमताज आहे,” असं त्यांनी सांगितलं.
फवाद खानने आपल्यासाठी पूर्ण रेस्टॉरंट बुक केलं होते आणि तो आपल्या मुलासह व पत्नीसह भेटायला आला होता, असंही त्या म्हणाल्या. “ते आपल्यापेक्षा वेगळे नाहीत, मी पाकिस्तानात जिथे गेले तिथे लोक मला आणि माझ्या बहिणीला भेटायला आले. आम्हाला खूप प्रेम आणि भेटवस्तू मिळाल्या. एका कलाकाराला आणखी काय हवं असतं? लोकांना माझा प्रत्येक चित्रपट माहीत होता, माझी सर्व गाणी माहीत होती,” असं त्यांनी नमूद केलं.
मुमताज म्हणाल्या, “पाकिस्तानी कलाकारांना भारतात येऊन काम करण्याची संधी मिळाली पाहिजे. ते प्रतिभावान आहेत. मला माहित आहे की मुंबईतील आपल्या चित्रपटसृष्टीत प्रतिभावान कलाकारांची कमतरता नाही, पण त्यांनाही संधी मिळायला हवी.”
