बॉलीवूड स्टार विकी कौशल लवकरच ‘बॅड न्यूज’ घेऊन प्रेक्षकांच्या भेटीला येणार आहे. अभिनेत्याचा आगामी चित्रपट ‘बॅड न्यूज’चा ट्रेलर नुकताच प्रदर्शित झाला आहे. शुक्रवारी मुंबई येथे या चित्रपटाचा ट्रेलर लॉंच इव्हेंट पार पडला. या इव्हेंटला विकी कौशल, तृप्ती डिमरा, ॲमी विर्क तसेच निर्माता करण जोहर आणि दिग्दर्शक आनंद तिवारी यांनी हजेरी लावली होती.
या ट्रेलर लॉंचच्या इव्हेंटदरम्यान मीडियाकडून विकी कौशलला प्रश्न विचारण्यात आला की, विकी आणि कतरिना प्रेग्नेन्सीची गुड न्यूज कधी देणार आहेत? विकी निरागसपणे हसला आणि म्हणाला की, ते दोघंही योग्य वेळी बातमी जाहीर करतील.
कतरिनाच्या प्रेग्नेन्सीची अफवा गेल्या अनेक महिन्यांपासून सुरू होती. आता यावर विकीने मौन सोडलं आहे. या इव्हेंटमध्ये जेव्हा विकीला याबद्दल विचारण्यात आलं तेव्हा विकी म्हणाला, आतासाठी आम्ही घेऊन येत असलेली बॅड न्यूज तुम्ही एन्जॉय करा, जेव्हा वेळ येईल तेव्हा आम्ही ती बातमी तुम्हाला नक्कीच देऊ.
कतरिना कैफच्या प्रेग्नेन्सीच्या अफवा त्यांच्या लंडन ट्रिपमधील व्हिडीओ व्हायरल झाल्यानंतर सुरू झाल्या होत्या. परंतु, अभिनेत्री गरोदर असल्याच्या चर्चांवर तिच्या टीमने स्पष्टीकरण दिलं होतं. ती गरोदर असल्याच्या निव्वळ अफवा आहेत. कतरिना गरोदर नाही, असं तिच्या टीमने स्पष्ट केलं होतं.
२०२१ रोजी राजस्थानमध्ये विकी आणि कतरिनाने लग्नगाठ बांधली. विकी शेवटचा ‘सॅम बहादूर’ या चित्रपटात दिसला होता, आता आनंद तिवारी दिग्दर्शित ‘बॅड न्यूज’मध्ये विकी प्रमुख भूमिकेत झळकणार आहे; तर ‘छावा’ या चित्रपटात विकी रश्मिका मंदानाबरोबर दिसणार आहे. तर कतरिना ‘मेरी ख्रिसमस’ या चित्रपटात शेवटची झळकली होती. कतरिना लवकरच फरहान अख्तर दिग्दर्शित ‘जी ले जरा’ या आगामी चित्रपटात झळकणार आहे.
दरम्यान, ‘बॅड न्यूज’ हा एक विनोदी चित्रपट आहे, जो हेटेरोपॅटर्नल सुपरफेकंडेशन (heteropaternal superfecundation) नावाच्या दुर्मीळ वैज्ञानिक घटनेशी संबंधित आहे, ज्याद्वारे एका महिलेला अनेक पुरुष भागीदारांद्वारे गर्भधारणा करता येते. ‘गुड न्यूज’चा सिक्वेल असलेला हा चित्रपट १९ जुलै रोजी चित्रपटगृहात प्रदर्शित होणार आहे.
