विधु विनोद चोप्रा यांच्या आगामी चित्रपटाची घोषणा; ‘या’ २ प्रामाणिक सरकारी अधिकाऱ्यांवर बेतलेली असेल कथा

हा चित्रपट आयपीएस अधिकारी मनोज कुमार शर्मा आणि आयआरएस अधिकारी श्रद्धा जोशी यांच्या जीवनावर बेतलेला आहे, पण ‘१२वी फेल’ हा बायोपिक नक्की नाही. खऱ्या घटनांपासून प्रेरित असलेला हा एक व्यावसायिक चित्रपट असणार आहे. शिवाय ‘१२वी फेल’ हा पहिला चित्रपट आहे ज्याचे चित्रीकरण नवी दिल्लीतील मुखर्जी नगर परिसरात झाले आहे. या परिसरात कित्येक नोकरशहांच्या पिढ्यान पिढ्या जन्मल्या आहेत.

चित्रपटाबद्दल बोलताना विधु विनोद चोप्रा म्हणाले, “जर प्रामाणिक व्यक्ती मोठ्या पदावर असेल तर तो खरोखर बदल घडवू शकतो. या चित्रपटाची कथा लिहिताना मी बऱ्याच आयएएस आणि आयपीएस अधिकाऱ्यांच्या संपर्कात आलो. जर या चित्रपटातून १० अधिकाऱ्यांना किंवा १० विद्यार्थ्यांनाही प्रामाणिकपणे काम करण्याची प्रेरणा मिळाली तर माझा हा प्रयत्न यशस्वी झाला असं मी समजेन.”

आणखी वाचा : KBC 14 : विवाहित पुरुषांना अमिताभ बच्चन यांचा मोलाचा सल्ला; म्हणाले “बायको सांगेल ते निमूटपणे…”

विधु विनोद चोप्रा यांच्या या चित्रपटात विक्रांत मॅसी मुख्य भूमिका साकारणार आहे. ‘१२वी फेल’चे पहिले शेड्यूल चंबळमध्ये पूर्ण झाले असून याचे पुढचे चित्रीकरण दिल्लीत सुरू आहे. हा चित्रपट २०२३ मध्ये प्रदर्शित होणार असल्याची शक्यता वर्तवण्यात येत आहे. विधु विनोद चोप्रा यांच्या ‘शिकारा’ या चित्रपटाला म्हणावा तसा प्रतिसाद मिळाला नव्हता. त्यामुळे त्यांना या चित्रपटाकडून बऱ्याच अपेक्षा आहेत.