राज्यात ‘द केरला स्टोरी’ चित्रपटाच्या प्रदर्शनावर बंदी घालण्याचे आदेश पश्चिम बंगालच्या मुख्यमंत्री ममता बॅनर्जी यांनी दिले आहेत. राज्यातील ज्या थिएटर्सच्या स्क्रीनवर चित्रपट दाखवला जात आहेत, तिथून चित्रपट हटवा, असं त्या आदेश देताना म्हणाल्या. यावेळी त्यांनी ‘द काश्मीर फाइल्स’चा उल्लेख करत टीका केली होती. त्यावर काश्मीर फाइल्सचे दिग्दर्शक विवेक अग्निहोत्रींनी प्रतिक्रिया देत ममता बॅनर्जींवर टीका केली आहे.
“द काश्मीर फाईल्स म्हणजे काय? हा चित्रपट एका विभागाचा अपमान करण्यासाठी होता. ‘द केरळ स्टोरी’ म्हणजे काय?… ही रंगवलेली कथा आहे,” असं पश्चिम बंगालच्या मुख्यमंत्री ममता बॅनर्जी चित्रपटावर बंदी घालण्याचे आदेश देताना म्हणाल्या. यानंतर विवेक अग्निहोत्री यांनी ट्वीट करत मानहानीचा खटला दाखल करण्याचा इशारा दिला आहे.
या व्हिडीओमध्ये ममता बॅनर्जी, माझ्याबद्दल बोलत आहेत, असा माझा अंदाज आहे. होय, मी बंगालमध्ये खिलाफतने भडकावलेल्या डायरेक्ट अॅक्शन डे नरसंहारातून वाचलेल्यांची मुलाखत घेण्यासाठी आलो होतो. तुम्ही का घाबरताय? ‘द काश्मीर’ फाइल्स हा नरसंहार आणि दहशतवादाबद्दलचा होता. काश्मिरी लोकांची बदनामी होते, असं तुम्हाला कशाच्या आधारावर वाटतंय? एखाद्या राजकीय पक्षाकडून चित्रपटाच्या निर्मितीसाठी निधी दिला जातो, असं तुम्ही कशाच्या आधारावर म्हणता?मी तुमच्याविरुद्ध मानहानीचा खटला आणि नरसंहार नाकारण्याचा खटला का दाखल करू नये? तुम्ही ज्याबद्दल बोलताय त्या चित्रपटाला ‘द दिल्ली फाइल्स’ म्हणतात ‘बंगाल फाईल्स नाही’ आणि कोणीही मला गप्प करू शकत नाही,” असं विवेक अग्निहोत्री यांनी ट्वीटमध्ये म्हटलं आहे.
दरम्यान, तमिळनाडूनंतर पश्चिम बंगालमध्येही वादग्रस्त ‘द केरला स्टोरी’ चित्रपटाच्या प्रदर्शनावर बंदी घालण्यात आली आहे. ममता बॅनर्जींनी चित्रपटावर बंदीचे आदेश दिल्यानंतर त्यावर राजकीय स्तरावरूनही प्रतिक्रिया उमटत आहेत.
