एमएक्स प्लेअरच्या ‘धारावी बँक’ या वेबसीरिजमधून बॉलिवूड अभिनेता विवेक ओबेरॉय पुन्हा चर्चेत आला आहे. मधली काही वर्षं बॉलिवूडपासून दूर फेकल्या गेलेल्या विवेकने पुन्हा चित्रपटसृष्टीत जम बसवायला सुरुवात केली आहे. तेलुगू, मल्याळम, कन्नड आणि तमिळ चित्रपटात नशीब आजमावल्यानंतर विवेक ओबेरॉयने आता मराठी चित्रपटात काम करायची इच्छा व्यक्त केली आहे.
विवेक ओबेरॉयने बऱ्याचदा त्याचा मित्र आणि अभिनेता रितेश देशमुखकडे याबद्दल विचारणा केली आहे. विवेक म्हणाला, “माझं आणि रितेशचं या बाबतीत बऱ्याचदा बोलणं होतं, तो मध्येच मला फोन करून सांगतो की मराठी चित्रपट करूया, मीदेखील त्याला उत्साहात होकार देतो अन् पुढे काहीच होत नाही.” रितेश देशमुखबरोबर मराठी चित्रपट करायची इच्छा विवेक ओबेरॉयने व्यक्त केली आहे.
आणखी वाचा : ‘या’ अभिनेत्रीच्या संशयास्पद मृत्यूनंतर रवीना टंडनला मिळालं ‘टीप टीप बरसा पानी’ हे गाणं
हिंदुस्तान टाईम्सशी संवाद साधताना विवेक म्हणाला, “मी कोणत्याही भाषेत काम करण्यास तयार आहे. प्रादेशिक चित्रपट हा आता प्रादेशिक राहिलेला नाही. जर तुमचा चित्रपट चांगला असेल तर तो सुपरहीट ठरतोच. रितेशच्या ‘वेड’चंच उदाहरण घ्या, या चित्रपटाने बॉक्स ऑफिसवर केलेली कामगिरी वाखाणण्याजोगी आहे.”
‘साथीया’, ‘कंपनी’सारखे लागोपाठ हीट चित्रपट देणाऱ्या विवेक ओबेरॉयला बॉलिवूडमधून बरंच लांब फेकण्यात आलं होतं. यानंतर विवेकच्या करिअरला उतरती कळा लागली आणि मग थेट ‘शूटआऊट अॅट लोखंडवाला’मधून विवेकने पुन्हा कमबॅक केलं. विवेकच्या नुकत्याच प्रदर्शित झालेल्या ‘धारावी बँक’ या सीरिजमधील भूमिकेचं लोकांनी खूप कौतुक केलं आहे. यात विवेकबरोबरच सुनील शेट्टीदेखील मुख्य भूमिकेत आहे.
