दिग्गज अभिनेते नाना पाटेकर यांनी आतापर्यंत अनेक सुपरहिट सिनेमे दिले आणि प्रेक्षकांचे मनोरंजन केले. सिनेसृष्टीतील काही अभिनेत्रींशी नानांचं नावही जोडलं गेलं. त्यापैकी मनीषा कोईराला. या दोघांच्या नात्याची इतक्या वर्षांनीही चर्चा होत असते. त्यांनी ‘अग्नीसाक्षी’, ‘युग पुरुष’, ‘खामोशी’ हे चित्रपट एकत्र केले. १९९६ मध्ये ‘अग्नी साक्षी’ सिनेमाच्या शूटिंगदरम्यान मनीषाचं विवेक मुशरनशी ब्रेकअप झालं होतं आणि ती नानांच्या प्रेमात पडली होती, असं म्हटलं जातं. त्यावेळी नाना विवाहित होते, पण ते पत्नी नीलकांतीपासून वेगळे राहत होते.
नाना पाटेकर व मनीषा कोईराला यांच्या अफेअरच्या चर्चा खूप गाजल्या. मनीषा त्याबद्दल कधीच बोलत नाही, पण नाना पाटेकरांना मनीषाबद्दल काही विचारलं की ते उत्तर देतात. नाना व मनीषा यांचं काही काळ रिलेशनशिपमध्ये राहिल्यानंतर ब्रेकअप झालं, असं म्हणतात. काही महिन्यांपूर्वी नाना पाटेकरांना ‘द लल्लनटॉप’ ला दिलेल्या मुलाखतीत मनीषा कोईरालाबद्दल विचारण्यात आलं. त्याचं उत्तर त्यांनी काय दिलं, ते जाणून घेऊयात.
हेही वाचा – नाना पाटेकर यांच्या पत्नीला पाहिलंत का? फक्त ७५० रुपयांत केलेलं लग्न; ‘अशी’ झालेली दोघांची पहिली भेट
मनीषा कोईरालाबद्दल नाना पाटेकर म्हणालेले…
नाना पाटेकरांना मुलाखतीत १० व्यक्तींबद्दल त्यांची प्रतिक्रिया विचारण्यात आली. बाळासाहेब ठाकरे, स्मिता पाटील, शरद पवार, अमिताभ बच्चन, शाहरुख खान अशा दिग्गजांची नावं यात होती. यापैकीच एक नाव मनीषा कोईरालाचं होतं. तिचं नाव ऐकताच नाना यांनी दिलेली प्रतिक्रिया चर्चेत होती. “महान अभिनेत्री. तिला खूप कमी वयात कर्करोग झाला. तू ‘हीरामंडी’ पाहिलीस का? त्यात तिने खूप छान काम केलं आहे. मी सीरिज पाहिली,” असं नाना पाटेकर मनीषाबद्दल म्हणाले होते.
मनीषा कोईरालाने २०२४ मध्ये आलेल्या ‘हीरामंडी’ सीरिजमध्ये महत्त्वपूर्ण भूमिका केली होती. तिच्या या भूमिकेचं त्यांनी कौतुक केलं. त्यानंतर ‘हीरामंडी’ पाहिल्यावर मनीषा कोईराला यांना शुभेच्छा दिल्या का? असं मुलाखतकाराने नाना पाटेकरांना विचारलं. ते उत्तर देत म्हणाले, “नाही. कदाचित तिचा फोन नंबर आता तो नाही, बदलला आहे.”
नाना पाटेकर व स्मिता पाटील यांची खूप चांगली मैत्री होती. स्मिता पाटील यांच्या निधनाबद्दल कळालं तेव्हा तुम्ही कुठे होता? असं विचारल्यावर नाना पाटेकर म्हणाले, “बाबा आमटेंसाठी शो सुरू होता, तिथेच मी होतो. मला गाडी तिच्यामुळेच शिकता आली. साडी घ्यायला सोबत न्यायची, कोणती साडी घ्यायचीय ते विचारायची. ती वेगळी होती, कमाल होती, खूप लवकर गेली. तिच्यासारखे लोक खूप कमी असतात. ती असती तर आताही इंडस्ट्रीत त्याच शिखरावर असती.” स्मिता पाटील यांच्यामुळेच सिनेसृष्टीत आल्याचं अनेकदा नाना पाटेकर सांगतात.
