‘स्कॅम १९९२’ सीरिजमध्ये हर्षद मेहता यांची भूमिका साकारणारा अभिनेता प्रतिक गांधी लोकप्रिय अभिनेता आहे. त्याने आतापर्यंत अनेक चित्रपट व सीरिजमध्ये काम केलंय. मुळचा गुजरातमधील सूरतचा असलेला प्रतिक मुंबईमध्ये नोकरी करायचा, पण त्याला अभिनयाची आवड होती. त्यामुळे तो नोकरीसह थिएटर करायचा. काही दिवसांपूर्वी ‘नवभारत टाइम्स’शी बोलताना त्याने नोकरी सोडून पूर्णवेळ अभिनय करण्याचा निर्णय घेतला, त्यावेळची आठवण सांगितली.
प्रतिक म्हणाला, “‘स्कॅम १९९२’ नंतर आयुष्य कसे बदलले हे पाहण्यासाठी माझे वडील जगले नाहीत. ते नेहमी एकच गोष्ट सांगायचे की तू अभिनय कर. फार फार तर काय होईल की तू लहान घरात राहशील, तुझ्याकडे गाडी नसेल, पण तू खूप खूश राहशील. त्यांचे हे शब्द मला आजही आठवतात. त्यांच्या म्हणण्यानुसार मी २५-२६ लाखांचे पॅकेज असलेली नोकरी सोडली. नंतरच्या काळात वडिलांना कॅन्सर झाला, अनेक प्रकारच्या समस्या आल्या, पण एकदाही त्यांच्या तोंडून निघालं नाही की तू नोकरी करत असतास तर आपली परिस्थिती वेगळी असती. मी नोकरी सोडली आणि मोठमोठं काम मिळू लागलं असं नव्हतं. मी थिएटर, लहान-मोठे गुजराती चित्रपट करत होतो. माझे वडील आज आमच्यासोबत नसले तरी ते कायम माझ्या पाठिशी आहेत. आजही मी माझ्या सगळ्या गोष्टी त्यांच्यासोबत शेअर करतो.”
पुढे तो म्हणाला, “मी दरम्यानच्या काळात बदललो नाही याची अनेक कारणं आहेत. आयुष्यात अनेक गोष्टी बघून मी इथपर्यंत पोहोचलो आहे. त्यामुळे प्रत्येक छोट्या गोष्टीला व्हॅल्यू देणे, हा माझ्या जीवनाचा आधार बनला आहे. मी शिक्षकांच्या कुटुंबातून आलो आहे, त्यामुळे तुमची वागणूक, तुम्ही कसे बोलता, अशा काही गोष्टी लहानपणापासून कुटुंबात पाहिल्या जातात, त्यामुळे त्या अचानक बदलणार नाहीत. दुसरे म्हणजे, मी २०-२५ वर्षांचा मुलगा. हे असे वय आहे जिथे तुम्ही खूप लवकर प्रभावित होऊ शकता. वयाच्या ४०-४२ व्या वर्षी असा बदल शक्य नाही,” असंही प्रतिकने नमूद केलं.
