Who is playing Aurangzeb in Chhaava: विकी कौशलची मुख्य भूमिका असलेला ‘छावा’ चित्रपट लवकरच प्रेक्षकांच्या भेटीला येणार आहे. विकीच्या या चित्रपटाबाबत प्रेक्षकांमध्ये खूप उत्सुकता आहे, ‘छावा’चा टीझर आल्यानंतर ही उत्सुकता शिगेला पोहोचली आहे. टीझरमधील विकीच्या अभिनयाचं कौतुक होत आहे, अशातच या टीझरमधील एका पात्राने लक्ष वेधून घेतलं आहे. हे पात्र साकारणारा अभिनेता कोण, असा प्रश्न प्रेक्षकांना पडला आहे.
विकी कौशल (Vicky Kaushal) आणि रश्मिका मंदानाचा ‘छावा’ या चित्रपटाची सध्या खूप चर्चा आहे. या चित्रपटाची कथा छत्रपती संभाजी महाराज यांच्या जीवनावर आधारित आहे. यामध्ये विकी कौशल छत्रपती संभाजी महाराजांची भूमिका साकारतोय. टीझर प्रदर्शित झाल्यानंतर या चित्रपटात औरंगजेबाच्या भूमिकेत कोण दिसणार, याबाबत चाहत्यांमध्ये उत्सुकता आहे.
औरंगजेबच्या भूमिकेतील बॉलीवूड अभिनेता कोण?
‘छावा’च्या टीझरमध्ये औरंगजेब शेवटी दिसतो. ‘शिवा गया, पर अपनी सोच छोड गया,’ असा टीझरच्या शेवटी औरंगजेबचा डायलॉग आहे. टीझर रिलीज झाल्यावर औरंगजेब साकारणारा अभिनेता नेमका कोण? असा प्रश्न चाहत्यांना पडला आहे. तर आपल्या दमदार अभिनयासाठी ओळखला जाणारा आणि आपल्या करिअरमध्ये अनेक जबरदस्त भूमिका साकारणारा बॉलीवूड अभिनेता अक्षय खन्ना ‘छावा’ चित्रपटात मुघल सम्राट औरंगजेबाच्या भूमिकेत दिसणार आहे. रश्मिका यामध्ये महाराणी येसूबाई यांची भूमिका साकारणार आहे.
हेही वाचा- ‘छावा’ चित्रपटाचा टीझर प्रेक्षकांना कसा वाटला? विकी कौशलचा लूक पाहून काय म्हणाले मराठी कलाकार?
‘छावा’च्या टीझरमुळे वाढल्या प्रेक्षकांच्या अपेक्षा
‘छावा’मध्ये प्रेक्षकांना अक्षय खन्ना (Akshaye Khanna) औरंगजेबाच्या भूमिकेत पाहायला मिळणार आहे. टीझरमध्ये अक्षयने लक्ष वेधून घेतलं आहे, त्यामुळे तो हे ऐतिहासिक पात्र तो कसे जिवंत करतो हे पाहणे रंजक ठरणार आहे. छत्रपती संभाजी महाराजांच्या आयुष्यात आलेली आव्हानं आणि त्यांचा जीवनप्रवास या चित्रपटात पाहायला मिळणार आहे. या चित्रपटात विकी कौशल, रश्मिका व अक्षय खन्ना असे दमदार कलाकार असल्याने चित्रपटाकडून प्रेक्षकांच्या अपेक्षा वाढल्या आहेत.
‘छावा’ चित्रपटाचं दिग्दर्शन लक्ष्मण उतेकर यांनी केलं आहे. हा चित्रपट ६ डिसेंबर रोजी प्रेक्षकांच्या भेटीला येणार आहे. ‘जरा हटके जरा बचके’ या कॉमेडी चित्रपटानंतर विकी आणि लक्ष्मण उतेकर यांचा हा एकत्रित दुसरा चित्रपट आहे.
