कपिल शर्माच्या घरात नवा सदस्य… जंजीर!

‘कॉमेडी नाईट्स विथ कपिल’ या छोट्या पडद्यावरील सुपरहिट कार्यक्रमाचा सूत्रधार कपिल शर्मा याच्या कुटुंबात नवा सदस्य आला आहे. कपिल शर्माने पोलीस दलाच्या सेवेतून निवृत्त झालेल्या एका लॅब्राडोर कुत्र्याला दत्तक घेतलंय. या कुत्र्याचे नाव जंजीर असे आहे. स्वतः कपिलनेच आपल्या घरातील नव्या सदस्याची माहिती ट्विटरच्या माध्यमातून त्याच्या चाहत्यांना करून दिली. कपिलने कुत्र्यासोबत काढलेले छायाचित्रही ट्विटरवर अपलोड केले आहे. जंजीर हा मुंबई पोलीस दलातील श्वानपथकात कार्यरत होता. जंजीरबद्दल आणखी माहिती तुम्हाला नंतर देईन, असेही कपिलने आपल्या ट्विटमध्ये लिहिले आहे. मुंबईतील अॅनिमल वेल्फेअर कम्युनिटीकडून कपिलने या कुत्र्याला दत्तक घेतले आहे.