राजू श्रीवास्तव यांचे बुधवारी सकाळी निधन झाले. गेले अनेक त्यांच्यावर दिल्लीतील एम्स रुग्णालयात उपचार सुरु होते. हृदयविकाराचा झटका आल्यानंतर १० ऑगस्टपासून त्यांच्यावर दिल्लीतील एम्स रुग्णालयात उपचार सुरु होते. मात्र त्यांची मृत्यूशी सुरु असलेली झुंज अखेर थांबली. गेले अनेक दिवस ते व्हेंटिलेटरवर होते. त्यांच्या निधनाने सिनेसृष्टीवर शोककळा पसरली आहे. अनेक बॉलिवूड कलाकरांनी ट्वीट करत त्यांना श्रद्धांजली वाहिली आहे. राजू यांचा जवळचा मित्र विनोदी अभिनेता सुनील पाल यानेदेखील एक व्हिडिओ शेअर केला आहे. या व्हिडिओमध्ये त्याने आपल्या भावना व्यक्त केल्या आहेत.
या व्हिडिओमध्ये तो भावुक दिसत आहे, तो असं म्हणाला की ‘प्रिय राजू भाई तुमची दुःखद बातमी कळली यावर विश्वास ठेवणे मुश्किल आहे खूपच कठीण आहे. आजचा दिवस नको यायला पाहिजे होता. ४० दिवस तुम्ही लढत होतात. मात्र आज जी बातमी आली ती आम्हा विनोदवीरांसाठी तसेच विनोदाची आवड असणाऱ्या प्रत्येकासाठी वाईट आहे. कोणी स्वप्नातदेखील असे बघितले नव्हते. आजचा दिवस खूप दुःखाचा दिवस आहे. आम्हा कुटुंबातील लोकांसाठी अत्यंत वाईट बातमी आहे’.
राजू श्रीवास्तव हे १० ऑगस्टला व्यायामशाळेत ट्रेडमिलवर धावत असताना त्यांना हृदयविकाराचा झटका आला होता. त्यांच्या छातीत दुखू लागल्यानंतर ते अचानक खाली पडले. यानंतर त्यांना प्रशिक्षकाने तातडीने रुग्णालयात दाखल केले होते.राजू श्रीवास्तव यांची अँजिओग्राफी करण्यात आली होती. यानंतर राजू श्रीवास्तव यांची प्रकृती खालवत गेली. मात्र यादरम्यान ते उपचारांना प्रतिसाद देत असल्याचे वृत्त समोर आलं होतं.
सुनील पाल, राजू श्रीवास्तव यांनी जर्नी ‘बॉम्बे टू गोवा’ चित्रपटात काम केले होते. ‘द ग्रेट इंडिया लाफ्टर चॅलेंज’ हा कार्य्रक्रम सुनील पाल याने जिंकला होता. राजू श्रीवास्तवदेखील या कार्य्रक्रमात सहभागी झाले होते.
