‘ससुराल सिमर का’ फेम अभिनेत्री दीपिका कक्कर लग्नानंतर टीव्ही इंडस्ट्रीमध्ये फारशी दिसलेली नाही. काही ठराविक मालिका वगळता दीपिका अभिनय क्षेत्रापासून दूर असल्याचं पाहायला मिळत आहे. दरम्यान हे दोघंही त्यांच्या युट्यूब व्लॉगच्या माध्यमातून त्याच्या चाहत्यांशी संवाद साधताना दिसतात. याशिवाय हे दोघंही सोशल मीडियावरही वेगवेगळे फोटो आणि व्हिडीओ शेअर करताना दिसतात. पण नुकत्याच शेअर केलेल्या काही फोटोंमुळे मात्र शोएब आणि दीपिकाला सोशल मीडियावर ट्रोल केलं जात आहे.
दीपिका आणि शोएब यांनी नुकतीच अजमेर शरीफ दर्ग्याला भेट दिली. याचे काही फोटो शोएबने त्याच्या इन्स्टाग्रावर शेअर केले आहेत. ज्यात दीपिकानं असे कपडे परिधान केले आहेत ज्यात तिचा पूर्ण चेहरा झाकला गेला आहे. दीपिका- शोएबचे हे फोटो सध्या सोशल मीडियावर चर्चेचा विषय ठरताना दिसत आहेत. त्यांच्या चाहते या फोटोंवरून त्यांचं कौतुक करताना दिसत असले तरी काही युजर्स मात्र या दोघांना ट्रोल करताना दिसत आहेत. एवढंच नाही तर काहींनी दीपिकाच्या दर्गा दर्शनावर आक्षेप घेतला आहे.
शोएबनं शेअर केलेल्या फोटोवर कमेंट करताना एका युजरनं लिहिलं, ‘जसं की आपल्याला माहीत आहे. दीपिकानं इस्लामचा स्वीकार केला आहे. ती शोएबसाठी काहीही करायला तयार आहे. पण शोएब तिच्यासाठी कधी मंदिरात जात नाही. तुम्ही दोघंही एकत्र खूप छान दिसता. आम्ही सर्व तुमच्यावर प्रेमही करतो. पण शोएब तू कधी दीपिकासोबत मंदिरात जा. तिलाही आनंद होईल.’ याशिवाय इतर अनेक युजर्सनी अशाप्रकारच्या कमेंट करत दीपिका आणि शोएबला अजमेर शरीफ जाण्यावरून ट्रोल करण्याचा प्रयत्न केला आहे.
दरम्यान दीपिका आणि शोएब अशाप्रकारे ट्रोल होण्याची ही पहिलीच वेळ नाही. याआधीही बऱ्याच वेळा या दोघांना वेगवेगळ्या कारणांनी ट्रोल करण्यात आलं आहे. पण या दोघींनी आता अशा गोष्टींकडे लक्ष देणं बंद केलं आहे. अगदी सुरुवातीला दीपिका कक्करनं जेव्हा धर्म परिवर्तन केल्याचं मान्य केलं होतं त्यावेळीही तिला सोशल मीडियावर ट्रोल करण्यात आलं होतं.
