दिग्दर्शक केदार शिंदेंनी घेतली उपमुख्यमंत्री देवेंद्र फडणवीस यांची भेट, म्हणाले “सर्वतोपरी मदत…”

केदार शिंदे हे सोशल मीडियावर सक्रीय असतात. ते नेहमी विविध फोटो व्हिडीओ शेअर करताना दिसतात. गेल्या काही दिवसांपासून ते सोशल मीडियावर महाराष्ट्र शाहीर या चित्रपटाबद्दल पोस्ट शेअर करताना दिसतात. नुकतंच त्यांनी इन्सटाग्रामवर या चित्रपटाबद्दल एक पोस्ट शेअर केली आहे. या पोस्टमध्ये त्यांनी उपमुख्यंत्री देवेंद्र फडणवीस यांच्यासोबतचा एक फोटो शेअर केला आहे. त्याला त्यांनी फार हटके कॅप्शन दिले आहे.
आणखी वाचा : “पण खंत एकच आहे की शिवसेनेचा…”, केदार शिंदे यांची ‘ती’ पोस्ट चर्चेत

महाराष्ट्र राज्य उप मुख्यमंत्री मा.ना. देवेंद्र फडणवीस यांच्या सोबत “महाराष्ट्र शाहीर” सिनेमाच्या शुटिंग बाबतीत चर्चा झाली. सर्वतोपरी मदत करण्याचे आश्वासन त्यांनी दिले, असे त्यांनी या फोटोला कॅप्शन देताना म्हटले आहे. त्यांच्या या भेटीचा फोटो सध्या चांगलाच चर्चेत आहे.

दरम्यान केदार शिंदे दिग्दर्शित, केदार शिंदे प्रॉडक्शन्स प्रस्तुत व बेला केदार शिंदे निर्मित ‘महाराष्ट्र शाहीर’ या चित्रपटात शाहिरांच्या मुख्य भूमिकेत अंकुश चौधरी झळकणार आहे. या चित्रपटाची पटकथा व संवाद प्रतिमा कुलकर्णी यांनी लिहिले आहेत. या चित्रपटातील संगीत महाराष्ट्राचे लाडके गायक अजय- अतुल यांनी दिले आहे. हा चित्रपट २८ एप्रिल २०२३ मध्ये प्रदर्शित होणार आहे. या चित्रपटाची घोषणा महाराष्ट्र दिनाच्या शुभमुहूर्तावर करण्यात आली होती.