‘हवाहवाई’ या आगामी मराठी चित्रपटाची मागील काही दिवसांपासून जोरदार चर्चा सुरू आहे. महेश टिळेकर यांनी चित्रपटाचं लेखन, दिग्दर्शन आणि संकलन केलं आहे. ‘द ग्रेट इंडियन किचन’ या बहुचर्चित मल्याळम सिनेमातील अभिनेत्री निमिषा सजयन या चित्रपटातून मराठी सिनेसृष्टीत पदार्पण करत आहे. या चित्रपटाचा ट्रेलर नुकताच प्रदर्शित करण्यात आला आहे. येत्या ७ ऑक्टोबरला हा चित्रपट सर्वत्र प्रदर्शित होणार आहे.
‘वन रूम किचन’, ‘गाव तसं चांगलं’ या चित्रपटांनंतर महेश टिळेकर ‘हवाहवाई’ या चित्रपटाच्या माध्यमातून मध्यमवर्गीय गृहिणीची संघर्षमय कथा घेऊन भेटीला येत आहेत. ‘मराठी तारका प्रॉडक्शन्स’ आणि ‘नाईनटिन नाईन प्रॉडक्शन्स’चे विजय शिंदे यांनी चित्रपटाची निर्मिती केली आहे. चित्रपटाचे संगीत पंकज पडघन यांचे असून चित्रपटातील गीते महेश टिळेकर यांनी लिहिली आहेत. ‘हवाहवाई’ चित्रपटातील एक गाणं ज्येष्ठ गायिका आशा भोसले यांनी गायलं आहे.
हेही वाचा >> पूर्वाश्रमीचा पती अन् बॉयफ्रेंडसह एकाच शोमध्ये दिसणार मलायका अरोरा; वाचा नेमकं काय घडणार?
‘हवाहवाई’ चित्रपटाची कथा मध्यमवर्गीय गृहिणीचा स्वप्नपूर्तीकडे होणाऱ्या संघर्षमय प्रवासावर आधारित आहे. चैनीत राहता आलं नाही तरी चालेल पण आयुष्य सुखाने जगता आलं पाहिजे, ही भावना चित्रपटातील नायिकेची आहे. आयुष्यात आलेल्या एका संकटामुळे चित्रपटातील नायिका घरसंसार सांभाळून फूडस्टॉल सुरू करण्याचा निर्णय घेते, असं ट्रेलरमध्ये दाखवण्यात आलं आहे. अभिनेत्री दाक्षिणात्य निमिषा सजयनने चित्रपटात ज्योती ही मुख्य भूमिका साकारली आहे. सामान्य गृहिणी असलेल्या ज्योतीच्या ध्येयपूर्तीचा प्रवास नेमका कोणत्या वळणावर जातो, हे बघणे प्रेक्षकांसाठी औत्सुक्यपूर्ण ठरणार आहे.
हेही वाचा >> “चित्रपट पाहायला एलियन्स…”, ‘ब्रह्मास्र’च्या यशावरून केआरकेनं केलेलं ट्वीट चर्चेत
‘हवाहवाई’ चित्रपटात अभिनेत्री निमिषा सजयनबरोबरच मराठी चित्रपटसृष्टीतील दिग्गज अभिनेत्री वर्षा उसगावकर महत्वाच्या भूमिकेत दिसणार आहेत. तसेच या चित्रपटात संजीवनी जाधव, किशोरी गोडबोले, समीर चौघुले, अतुल तोडणकर, सिद्धार्थ जाधव, गौरव मोरे, मोहन जोशी, स्मिता जयकर, गार्गी फुले, प्राजक्ता हनमघर, पूजा नायक, सीमा घोगळे, बिपिन सुर्वे,विजय आंदळकर, अंकित मोहन या कलाकारांनी महत्वपूर्ण भूमिका साकारल्या आहेत.