राम गोपाल वर्मा यांचं वक्तव्य पुन्हा चर्चेत, म्हणाले “आमिरलाच हीट चित्रपटाचा फॉर्म्युला माहीत नाही, तर…”

नुकतंच दिग्दर्शक राम गोपाल वर्मा यांनी चित्रपटाच्या अपयशाबद्दल आणि लोकांच्या आवडीनिवडीबद्दल खुलासा केला आहे. बॉलिवूड हंगामाला दिलेल्या मुलाखतीत राम गोपाल वर्मा म्हणाले, “फक्त समीक्षकच चित्रपट गांभीर्याने बघतात. प्रेक्षकांना आता काय पसंत पडेल याचा अंदाज लावणं कठीण झालं आहे. प्रेक्षकांची चित्रपटाबद्दलची आवड बदलत चालली आहे. बॉक्स ऑफिसची सद्यस्थिती फार बिकट आहे. कुणी विचार केला होता का की आमिर खानचा चित्रपट फ्लॉप ठरेल? जर आमिर खानलाच हिट चित्रपट द्यायचा फॉर्म्युला ठाऊक नाहीये तर बाकीच्यांचं सोडूनच द्या.”

आणखी वाचा : ‘लाइगर’ फ्लॉप झाल्यानंतर अभिनेत्री अनन्या पांडेने गाठलं थेट मथुरा, ‘हे’ आहे त्यामागचं कारण

याच मुलाखतीत राम गोपाल वर्मा यांनी ओटीटीवर प्रदर्शित होणारे चित्रपट आणि वेबसीरिज याविषयीसुद्धा आपलं मत मांडलं आहे. ते म्हणतात, “बऱ्याच लोकांना ओटीटी हा पर्याय चित्रपटासाठी धोका वाटतो, पण मला वैयक्तिक युट्यूब ही माध्यम भयंकर आवडतं. त्यावर वेगवेगळ्या प्रकारचे व्हिडिओज येत असतात. मी आता चित्रपट बघायला चित्रपटगृहात फार कमी जातो, ओटीटी ही माझ्यासाठी उत्तम सोय आहे.”

चार वर्षांनी चित्रपट घेऊन आलेल्या आमिरची अवस्था बिकट आहे. ‘फॉरेस्ट गंप’ या मूळ इंग्रजी चित्रपटाच्या रिमेकच्या हक्कांसाठी आमिर आणि त्याच्या टीमने तब्बल ८ वर्षं मेहनत घेतली होती.

राम गोपाल वर्मा हे सध्या चित्रपटसृष्टीमध्ये सक्रिय नसले तरी त्यांची वक्तव्यं अधून मधून प्रचंड व्हायरल होतात. वादग्रस्त ट्वीटसाठी ते खासकरून ओळखले जातात. राम गोपाल वर्मा यांचा ‘डेंजरस’ नावाचा अत्यंत बोल्ड चित्रपट सध्या वादाच्या भोवऱ्यात अडकला आहे. या चित्रपटात एका लेसबीयन जोडप्याची कथा मांडली असल्याने या चित्रपटावर प्रदर्शनासाठी बंदी आणली आहे. इतकंच नव्हे तर राम गोपाल वर्मा यांनी स्वतःचा ओटीटी प्लॅटफॉर्मही सुरू केला आहे.