लोकप्रिय अमेरिकन गायिका सेलेना गोमेझ नुकतीच यंगेस्ट बिलेनियर ठरली. अवघ्या ३२ वर्षांच्या सेलेनाची (Selena Gomez net worth) संपत्ती १० हजार कोटी रुपये आहे. यंगेस्ट बिलेनियरच्या यादीत नाव आल्यानंतर आता तिने तिच्या वैयक्तिक आयुष्याबाबत मोठो खुलासा केला आहे. वैद्यकीय कारणांमुळे बाळाला जन्म देऊ शकत नाही, असं तिने सांगितलं आहे.
सेलेना म्हणाली, “मी हे यापूर्वी कधीच सांगितलं नव्हतं, परंतु दुर्दैवाने मी बाळाला जन्म देऊ शकत नाही. बरीच वैद्यकीय कारणं आहेत, ज्यामुळे माझा आणि बाळाचा जीव धोक्यात येऊ शकतो. मला हे कळाल्यानंतर सावरायला थोडा वेळ लागला.” यासंदर्भात बीबीसीने वृत्त दिले आहे.
सेलेनाला आहे ल्युपस नावाचा आजार
सेलेनाला ल्युपस नावाचा एक आजार आहे. यामध्ये रुग्णाच्या शरीराची रोगप्रतिकारक शक्ती स्वतःच्याच ऊतींवर हल्ला करते, ज्यामुळे रुग्णाला अनेक समस्यांचा सामना करावा लागतो. २०१७ मध्ये ल्युपससंदर्भातील गुंतागुंतीमुळे सेलेनाची किडनी ट्रान्सप्लांट करण्यात आली. तसेच तिला बायपोलर डिसऑर्डर होता, त्याबद्दलही ती अनेकदा बोलत असते. बायपोलर डिसऑर्डरवरील औषधांमुळे तिला आई होण्यास अडचणी येऊ शकतात, असं सेलेनाने २०२२ मध्ये सांगितलं होतं.
सेटवरचं प्रेम, लग्न अन्…; प्रसिद्ध अभिनेत्री दुसऱ्यांदा झाली आई, चिमुकल्या बाळाची दाखवली पहिली झलक
आता काळ बदलला आहे, वैद्यकीय कारणांमुळे बाळाला जन्म न देऊ शकणाऱ्या महिला सरोगसी किंवा बाळ दत्तक घेणे असे पर्यायी मार्ग वापरू शकतात, त्याबद्दल तिने मत मांडलं. “असं काही घडेल याची मी कल्पना केली नव्हती. मला वाटलं होतं की सर्व महिला जशा आई होतात, तशीच मीही होईन, पण तसं नाही. मी या धक्क्यातून सावरले आहे. आता सरोगसी व दत्तक घेण्यासारखे पर्याय उपलब्ध आहेत,” असं सेलेना व्हॅनिटी फेअरला दिलेल्या मुलाखतीत म्हणाली.
आता आई होण्यासाठी बरेच पर्याय आहेत, त्याबद्दल सेलेना म्हणाली, “सरोगसी किंवा बाळ दत्तक घेण्यास लोक इच्छुक आहेत, ही चांगली गोष्ट आहे. मी त्या प्रवासासाठी उत्सुक आहे. एकेकाळी मी बाळाला जन्म देण्याचा विचार केला होता, त्याहून आता परिस्थिती असली तरी शेवटी ते माझेच बाळ असेल.”
सेलेना गोमेझ सध्या म्युझिक प्रॉड्युसर बेनी ब्लँकोसह रिलेशनशिपमध्ये आहे.
