Allu Arjun Birthday : दाक्षिणात्य कलाविश्वातील सर्वात स्टायलिस्ट अभिनेता अशी ओळख असलेल्या अल्लू अर्जुनची लव्हस्टोरी थोडी हटके आहे. अगदी एखाद्या चित्रपटाला साजेशी त्याची लव्हस्टोरी असून आज त्याच्या वाढदिवसानिमित्त आपण त्याचं स्नेहावरील प्रेम ते लग्नापर्यंतचा प्रवास जाणून घेणार आहोत.
दाक्षिणात्य कलाविश्वातील लोकप्रिय अभिनेता म्हणून अल्लू अर्जुनकडे पाहिलं जातं. त्याची क्रेझ केवळ टॉलिवूडमध्येच नव्हे तर बॉलिवूडमध्येदेखील असल्याचं पाहायला मिळतं. विशेष म्हणजे तरुणींमध्ये त्याची कमालीची क्रेझ आहे. मात्र अनेक तरुणींच्या मनावर राज्य करणारा हा अभिनेता मात्र एका लग्नात एका मुलीच्या प्रेमात पडला आणि तिच्याशीच त्याने लग्नगाठ बांधली.
एका मित्राच्या लग्नात अल्लू अर्जुन आणि स्नेहाची पहिली भेट झाली. खरंतर पहिल्या भेटीतच हे दोघं एकमेकांच्या प्रेमात पडले होते. अल्लूने जेव्हा पहिल्यांदा स्नेहाला पाहिलं तेव्हा तिने त्याच्याकडे पाहून स्मित हास्य केलं. तिचं हे हास्य पाहूनच तो त्याक्षणी तिच्या प्रेमात पडला. विशेष म्हणजे याच लग्नात त्यांनी एकमेकांचे फोन नंबर एक्सचेंज केले. त्यानंतर त्याचं फोनवर बोलणं वाढलं.
तेव्हा स्नेहा नुकतीच अमेरिकेमधून तिची मास्टर्सची डिग्री पूर्ण करुन भारतात परतली होती. स्नेहा हैदराबादमधील एका प्रसिद्ध व्यावसायिकाची मुलगी होती. तर अल्लू अर्जुनदेखील त्यावेळी लोकप्रियतेच्या शिखरावर होता. त्याने तेलुगू कलाविश्वात स्वत:चं स्थान निर्माण केलं होतं. त्यामुळे स्नेहा त्याला एक सुपरस्टार म्हणूनच ओळखत होती. विशेष म्हणजे अल्लू आणि स्नेहा नात्याला घरातल्यांचा पाठिंबा नव्हता. अल्लूने त्याच्या वडिलांना खूप विनवण्या केल्यानंतर ते स्नेहाच्या घरी अल्लूसाठी लग्नाची मागणी घालायला गेले. मात्र स्नेहाच्या वडिलांनी या लग्नास नकार दिला. परंतु अनेक प्रयत्न, विनवण्या करुन या दोघांनीही कुटुंबियांना लग्नासाठी तयार केलं. त्यानंतर ६ मार्च २०११ मध्ये या दोघांनी लग्नगाठ बांधली.
दरम्यान, आज अल्लू अर्जुनच्या वाढदिवसानिमित्त ‘पुष्पा २’ चित्रपटाचा टीझर व त्याचा खास लूक प्रदर्शित करण्यात आला आहे. अल्लूच्या लूकला चाहत्यांकडून पसंती मिळत आहे.
