बॉलिवूड अभिनेता हृतिक रोशन त्याच्या फिटनेस आणि चित्रपटांमुळे चाहत्यांमध्ये लोकप्रिय आहे. हृतिकला बॉलिवूडचा ग्रीक गॉड असंही म्हटलं जातं. मागच्या दोन दशकांपासून अभिनय क्षेत्रात काम करत असलेल्या हृतिकचा बराच मोठा चाहतावर्ग आहे. त्यामुळेच हृतिक सोशल मीडियावर नेहमीच चर्चेत असतो. आताही काही व्हायरल फोटोंमुळे सोशल मीडियावर हृतिकच्या नावाची चर्चा होताना दिसत आहे. हॉलिवूड अभिनेत्री सामंथा लॉकवूडसोबतचे हृतिकचे काही फोटो सध्या सोशल मीडियावर व्हायरल होताना दिसत आहेत.
सामंथानं तिच्या इन्स्टाग्रामवर हृतिकसोबतचे काही फोटो शेअर केले आहेत. ज्याची सोशल मीडियावर जोरदार चर्चा होताना दिसत आहे. या फोटोंमध्ये दोघंही कॅमेराला पोझ देताना दिसत आहेत. या फोटोंमध्ये हृतिक रोशन कॅज्युअल लूकमध्ये दिसत आहे तर सामंथा प्रिंटेड गुलाबी रंगाच्या टॉपमध्ये दिसत आहे. हे फोटो शेअर करताना सामंथानं लिहिलं, ‘अभिनयाची पार्श्वभूमी असलेल्या कुटुंबातून आलेल्या या अभिनेत्याला भेटून आनंद झाला. त्याला अॅक्शनची आवड आहे. सुपरस्टार हृतिक रोशन.’
मागच्या काही काळापासून सामंथा आणि हृतिक एका प्रोजेक्टवर काम करत आहेत असं बोललं जात आहे. मात्र याची कोणत्याही प्रकारची अधिकृत माहिती अद्याप मिळालेली नाही. त्यामुळे या माहितीत कितपत तथ्य आहे हे हृतिक आणि सामंथा यांनाच माहीत. आगामी काळात सामंथा ‘शूट द हिरो’ आणि ‘हवाई फाइव्ह ओ’ या चित्रपटांमध्ये दिसणार आहे.
हृतिक रोशनच्या कामाबद्दल बोलायचं तर तो लवकरच सिद्धार्थ आनंद यांच्या ‘फायटर’ या चित्रपटात दिसणार आहे. या चित्रपटात अभिनेत्री दीपिका पादुकोणची मुख्य भूमिका असणार आहे. या चित्रपटाच्या निमित्तानं हृतिक आणि दीपिका पहिल्यांदा एकत्र काम करताना दिसणार आहेत. या शिवाय तो ‘विक्रमवेधा’च्या हिंदी रिमेकमध्येही दिसणार आहे. यात त्याच्यासोबत अभिनेता सैफ अली खानही महत्त्वपूर्ण भूमिकेत दिसणार आहे.
