हृतिकच्या ‘सुपर ३०’ ला अखेर प्रदर्शनाचा मुहूर्त सापडला

चित्रपटाचं काही काम बाकी आहे त्यामुळे प्रदर्शनास दिरंगाई होत असल्याची माहिती रिलायन्स एंटरटेनमेंटकडून देण्यात आली आहे. त्यामुळे हा चित्रपट आता २६ जुलै २०१९ मध्ये प्रदर्शित होत आहे. या चित्रपटाचा दिग्दर्शक विकास बहलवर ‘मी टू’ मोहिमेअंतर्गत अनेक महिलांनी लैंगिक गैरवर्तणुकीचे आरोप केले होते.  विकासवरील आरोपानंतर हृतिकनं त्याच्यासोबत काम न करण्याचा निर्णयही घेतला होता. त्यामुळे काही काळ चित्रपटाचं शुटींग लांबलं होतं. तसेच या चित्रपटात अनेक नवीन दृश्यांचा ऐनवेळी समावेश करण्यात आला त्यामुळेही चित्रीकरणास विलंब झाला.

हा चित्रपट नोव्हेंबर २०१८ मध्ये प्रदर्शित होणार होता त्यानंतर निर्मात्यांनी प्रदर्शनाची तारीख बदलून ती २५ जानेवारी २०१९ केली होती मात्र तोपर्यंतही चित्रपटाचं काम पूर्ण न झाल्यानं अखेर ‘सुपर ३०’ ला जुलै महिन्यात प्रदर्शनाचा मुहूर्त सापडला आहे. आयआयटी कोचिंग संस्थेचे संस्थापक आनंद कुमार यांच्या जीवनावर आधारित हा चित्रपट असणार आहे.