लोकप्रिय मालिका ‘हम पांच’ पुन्हा एकदा प्रेक्षकांच्या भेटीला

‘हम पांच फिर से’, असं या मालिकेचं नवं नाव असून ऐस्सेल व्हिजन प्रायव्हेट लिमिटेडअंतर्गत ही मालिका प्रसारित होणार आहे. नव्याने सुरु होणाऱ्या या मालिकेमध्ये नव्या चेहऱ्यांना प्राधान्य देण्यात येणार आहे. सध्या या मालिकेमध्ये अभिनेत्री जयश्री व्येंकटरमणा ही काजोल भायची भूमिका वठविणार आहे. जयश्रीने स्वत: या विषयी खुलासा केला आहे. तर अंबिका सप्रे राधिकाची भूमिका साकारणार आहे. या अभिनेत्रींव्यतिरिक्त अन्य कलाकारांचा शोध सुरु आहे. त्यामुळे येत्या मे महिन्यामध्ये हा कार्यक्रम सुरु होणार असल्याचं सांगण्यात येत आहे.

१९९५ ते २००६ या कालावधीमध्ये ‘हम पाच’ या मालिकेने प्रेक्षकांच चांगलंच मनोरंजन केलं होतं. या मालिकेमध्ये अशोक सराफ, प्रिया तेंडुलकर, राखी टंडन, भैरवी रैचुरा,वंदना पाठक आणि विद्या बालन यांसारखे कलाकार झळकले होते. या साऱ्यांनी आपल्या उत्तम अभिनयामुळे मालिकेची रंगत वाढविली होती.त्यामुळे आता पुन्हा नव्याने सुरु होणाऱ्या या मालिकेत नवे कलाकार प्रेक्षकांचं मनोरंजन कसं करतात हे पाहणं औत्सुक्याचं ठरणार आहे.