रजनीकांत या नावाची जादू आपण नुकतीच बॉक्स ऑफिसवर अनुभवली आहोत. सुपरस्टार रजनीकांत यांचा ‘जेलर’ या चित्रपटाने बॉक्स ऑफिसवर अक्षरशः धुमाकूळ घातला. चित्रपटाने जवळपास ६०० कोटींची कमाई केली आहे. रजनीकांत यांचे सगळेच चाहते याचा आनंद साजरा करत आहेत. प्रेक्षकांनी या चित्रपटाला अक्षरशः डोक्यावर घेतलं आहे.
नुकताच हा चित्रपट प्राइम व्हिडीओ या ओटीटी प्लॅटफॉर्मवरही प्रदर्शित झाला आहे. या चित्रपटाचा आनंद साजरा करण्यासाठी निर्माते व सन पिक्चर्सचे सर्वेसर्वा कलानिधी मारन यांनी चित्रपटाच्या संपूर्ण ३०० क्रू मेंबर्सना सोन्याची नाणी भेट म्हणून दिली आहेत.
आणखी वाचा : शाहरुख खानच्या ‘जवान’बद्दलची ‘ही’ ४ सिक्रेट्स तुम्हाला ठाऊक आहेत का? जाणून घ्या
चित्रपटाला मिळालेलं घवघवीत यश आणि बॉक्स ऑफिसवर केलेली कमाई यासाठी सगळ्यांचे आभार मानायचे म्हणून कलानिधी यांनी ही सोन्याची नाणी चित्रपटावर काम करणाऱ्या सहकाऱ्यांना भेट दिल्याचं स्पष्ट झालं आहे. चित्रपट समीक्षक मनोबाला विजयबालन यांनी एक व्हिडीओ सोशल मीडियावर शेअर करत याबद्दल माहिती दिली.
याआधी चित्रपटाची कामगिरी पाहता कलानिधी यांनी सुपरस्टार रजनीकांत यांना ब्रँड न्यू BMW X7 ही गाडी भेट म्हणून दिल्याची जबरदस्त चर्चा झाली होती. इतकंच नव्हे तर त्यांनी दिग्दर्शक नेल्सन यांनाही पोर्शची गाडी भेट दिली होती. याखेरीज ‘जेलर’साठी रजनीकांत यांना दिलेला धनादेश १०० कोटींचा असल्याचं म्हटलं जात आहे. यापूर्वी त्यांना चित्रपटासाठी मानधन म्हणून ११० कोटी रुपये मिळाले आहेत.