दाक्षिणात्य सुपरस्टार ज्युनिअर एनटीआर हा एस. एस राजामौली दिग्दर्शित ‘आरआरआर’ या दाक्षिणात्य चित्रपटात झळकला होता. या चित्रपटाने अनेक पुरस्कारांवर नाव कोरले होते. आता लवकरच ज्युनिअर एनटीआर हा कोराताला शिवा या चित्रपटात झळकणार आहे. तसेच तो आणखी एका तेलुगू चित्रपटात झळकणार आहे. या चित्रपटाचे नाव एनटीआर ३० असण्याची शक्यता वर्तवली जात आहे. गेल्या काही दिवसांपासून हा चित्रपट सातत्याने चर्चेत आहे. या चित्रपटाच्या अपडेटसाठी अनेक चाहते त्याच्या पोस्टवर कमेंट करताना दिसतात.
मात्र नुकतंच ज्युनिअर एनटीआरने याबद्दल थेट मत व्यक्त केले आहे. त्याबरोबर त्याने चाहत्यांना अतिशय नम्रपणाने याबद्दल सांगितले आहे. “तुम्ही सतत चित्रपटाशी संबंधित माहिती विचारल्याने माझ्यावर दबाव येतो”, असे त्याने यावेळी म्हटले आहे.
आणखी वाचा : “माणसाचं वय…” रेणुका शहाणे आणि शाहरुख खानमध्ये रंगलेल्या संभाषणादरम्यान अभिनेत्रीच्या पतीने केलेले ‘ते’ ट्वीट चर्चेत
“कधीकधी आम्ही जेव्हा एखाद्या चित्रपटावर काम करत असतो, तेव्हा त्यासंबंधित माहिती शेअर करण्यासाठी फारशी माहिती उपलब्ध नसते. आम्ही प्रत्येक तास आणि दररोज याबद्दल तुम्हाला अपडेट देऊ शकत नाही. मी तुमचा उत्साह समजू शकतो, पण कधीकधी या सर्व गोष्टींमुळे निर्माते आणि दिग्दर्शक हे फार दबावाखाली येतात. अनेकदा दबावामुळे आम्ही अशी माहिती देतो ज्याचे कोणतेही मूल्य नसते आणि त्यामुळे चाहत्यांची निराशा होऊ शकते.
हा दबाव फक्त मला एकट्याला नव्हे तर अनेकांना जाणवतो. पण ही गोष्ट चांगली नाही. आमच्याकडे काही अपडेट असल्यास आम्ही ते सर्वात आधी आमच्या चाहत्यांपर्यंत शेअर करतो. अनेक गोष्टी तर आम्ही आमच्या पत्नीला घरी सांगण्यापूर्वी चाहत्यांना सांगत असतो. त्यांना नवनवीन माहिती देत असतो. कारण तुम्ही आमच्यासाठी किती मौल्यवान आहात याची आम्हाला पूर्ण कल्पना आहे”, असे ज्युनिअर एनटीआर म्हणाला.
दरम्यान दाक्षिणात्य सुपरस्टार ज्युनिअर एनटीआरचे जगभरात चाहते आहेत. ज्युनिअर एनटीआरने आपल्या अभिनयाच्या जोरावर कलासृष्टीमध्ये आपलं स्थान बळकट केलं. ज्युनिअर एनटीआर दिसायला साधा असला तरी तो कोट्यावधी रुपयांचा मालक आहे. दाक्षिणात्य सुपरस्टार अभिनेत्यांच्या यादीमध्ये ज्युनिअर एनटीआरचं नाव आवर्जून घेतलं जातं. तो कायमच सोशल मीडियावर सक्रीय असतो.
