रिलायन्स समुहाचे अध्यक्ष मुकेश अंबानींच्या घरी सध्या लाडक्या लेकाच्या लग्नाची जोरदार तयारी सुरू असल्याचं पाहायला मिळत आहे. अनंत अंबानी आणि राधिका मर्चंट यांचा भव्य विवाहसोहळा येत्या १२ जुलैला पार पडणार आहे. यापूर्वी दोघांच्या लग्नाआधीच्या विधींना सुरुवात झालेली आहे. नुकताच अंबानींच्या घरी ‘मामेरु’ समारंभ साजरा करण्यात आला. यानंतर आता सर्वांना अनंत-राधिकाच्या संगीत सोहळ्याची उत्सुकता लागली आहे. या सोहळ्यासाठी खास जस्टिन बिबर भारतात आला आहे.
शुक्रवारी सकाळी मुंबईत विमानतळावर जस्टिन बिबरने एन्ट्री घेताच त्याच्या सगळ्या चाहत्यांमध्ये आनंदाचं वातावरण पसरलं. गुलाबी रंगाचा टी-शर्ट, डोक्यावर लाल टोपी अशा हटके लूकमध्ये जस्टिन दिसला. यापूर्वी २०१७ मध्ये तो भारतात आला होता. आता अंबानींच्या घरातील संगीत सोहळ्यासाठी तब्बल ७ वर्षांनी हा प्रसिद्ध हॉलीवूड गायक पुन्हा एकदा भारतात दाखल झाला आहे. याचा व्हिडीओ ‘मानव मंगलानी’ या पापाराझी इन्स्टाग्राम पेजवरून शेअर करण्यात आला आहे.
अनंत-राधिकाचा संगीत सोहळा ५ जुलैला रात्री पार पडणार आहे. या सोहळ्यासाठी अंबानी कुटुंबीय खास तयारी करत आहेत. हिंदुस्तान टाइम्सने लिओडियासद्वारे दिलेल्या वृत्तानुसार, जस्टिन बिबर ‘सेलिब्रेशन ऑफ हार्ट्स’ म्हणजेच अंबानींच्या संगीत समारंभात काही तासांचा परफॉर्मन्स सादर करण्यासाठी तब्बल १० दशलक्ष डॉलर म्हणजे ८३ कोटी रुपये इतकं मानधन घेणार आहे. जस्टिनचं मानधन ऐकून अनेकांच्या भुवया उंचावल्या आहेत. कारण, रिहानापेक्षा जास्त मानधन या हॉलीवूड गायकाने आकारलं आहे.
दरम्यान, अनंत – राधिकाच्या संगीत सोहळ्यासाठी आज अंबानींच्या घरी भव्य तयारी करण्यात येणार आहे. यापूर्वी जामनगरमध्ये झालेल्या प्री-वेडिंग कार्यक्रमाला हॉलीवूड गायिका रिहानासह अनेक बॉलीवूड सेलिब्रिटी उपस्थित होते. पुढच्या आठवड्यात अनंत अंबानी आणि राधिका मर्चंट यांचं लग्न पारंपारिक हिंदू पद्धतीनुसार होणार आहे. हे जोडपं १२ जुलै रोजी लग्नगाठ बांधेल. लग्नाच्या दिवशी, पाहुण्यांसाठी खास पारंपरिक थीम ठेवण्यात आली आहे. राधिका मर्चंटबद्दल सांगायचं झालं, तर ती एन्कोर हेल्थकेअरचे सीईओ वीरेन मर्चंट आणि उद्योजक शैला मर्चंट यांची मुलगी आहे.
