Indian 2 Intro: दाक्षिणात्य सिनेसृष्टीतील दिग्गज अभिनेते कमल हासन सध्या त्यांच्या आगामी ‘इंडियन २’ या चित्रपटामुळे चर्चेत आहेत. हा चित्रपट पुढील वर्षी म्हणजेच २०२४ मध्ये प्रदर्शित होणार आहे. गेली बरीच वर्षं प्रेक्षक या चित्रपटाची आतुरतेने वाट पहात होते. हीच प्रेक्षकांची उत्सुकता लक्षात घेता चित्रपट निर्मात्यांनी आज ‘इंडियन २’ या चित्रपटाचा इंट्रो व्हिडिओ प्रदर्शित केला आहे.
गेल्या काही दिवसांपासून या इंट्रो व्हिडीओची सिनेप्रेमी आतुरतेने वाट बघत होते. वेगवेगळ्या भाषेतील हा इंट्रो व्हिडीओ त्या त्या भाषेतील बड्या सेलिब्रिटीने शेअर केला आहे. तमिळमध्ये हा इंट्रो सुपरस्टार रजनीकांत यांनी सादर केला, तर तेलुगू भाषेतील व्हिडीओ एसएस राजामौली यांनी सादर केला, मल्याळम भाषेतील व्हिडीओ मोहनलाल यांनी तर हिंदीमधील व्हिडीओ आमिर खानने सादर केला. हिंदीत या चित्रपटाचे नाव ‘हिंदुस्तानी २’ आहे.
‘इंडियन २’ च्या टीझरच्या सुरुवातीलाच कमल हासन यांचा जबरदस्त देशभक्तीपर संवाद आपल्या कानावर पडताना दिसतो. कमल हसन ‘इंडियन’ चित्रपटाच्या माध्यमातून २६ वर्षांनंतर पुन्हा एकदा भ्रष्टाचार मूळापासून नष्ट करण्यासाठी पूर्णपणे सज्ज असल्याचे चित्रपटाचा टीझर पाहून स्पष्ट होत आहे. याबरोबरच या इंट्रोमध्ये व्हीएफएक्सचाही उत्तम वापर करण्यात आला आहे.
या इंट्रोमध्ये कमल हासन यांचा लुक प्रेक्षकांना चांगलाच पसंत पडला आहे. यात कमल हासन यांच्यासह सिद्धार्थ, रकुल प्रीत सिंह, काजल अग्रवाल, प्रिया भवानी शंकर यांचीही झलक पाहायला मिळत आहे. एस. शंकर यांच्या ‘इंडियन २’मध्ये पुन्हा कमल हासन सेनापती आणि चंद्रू या दुहेरी भूमिका निभावणार आहेत. चित्रपटाच्या रिलीज डेटबद्दल अद्याप कोणताही खुलासा झालेला नसला तरी हा २०२४ चा बहूप्रतीक्षित अन् बहुचर्चित चित्रपट ठरणार हे नक्की.
