बॉलीवूड अभिनेत्री कंगना रणावतने आपल्या कसदार अभिनयाच्या जोरावर सिनेक्षेत्रात आपले नाणे खणखणीत असल्याचे सिद्ध करून दाखवले आहे. आणि तिला मिळालेल्या दोन राष्ट्रीय पुरस्कारांनी यावर शिक्कामोर्तब देखील झाले आहे. कंगनाचा ‘तनु वेड्स मनु’ चित्रपटाचा सिक्वल देखील आता तिकीटबारीवर हिट होण्यास सज्ज झाला आहे.  ‘तनु वेड्स मनु रिटनर्स’ या सिक्वलमध्ये कंगना दुहेरी भूमिका साकारत आहे. विशेष म्हणजे, दोन्ही भूमिका परस्पर विरोधी असून आपल्या दमदार अभिनयाने कंगना पुन्हा एकदा अभिनयाची ‘क्विन’ होण्यास आतुर आहे. ‘तनु वेड्स मनु’मधील कंगनाची ‘तनु’ व्यक्तीरेखेला सिक्वलमध्ये कायम ठेवण्यात आले असून ‘कुसूम कुमारी’ नावाची ‘रफ-टफ’ अशी ‘टॉमबॉय’ स्वरूपाची दुहेरी व्यक्तीरेखा कंगनाने साकारली आहे. यामध्ये कंगनाच्या लूकमध्ये व्यक्तिरेखासापेक्ष बदल करण्यात आले आहेतच सोबत कंगनानेही आपल्या अभिनयाच्या जोरावर ‘कुसूम कुमारी’ आणि ‘तनु’ यांच्यातील वेगळेपण दाखवण्यासाठी कंगनाचेही प्रयत्न ट्रेलरमध्ये दिसून येतात. आता कंगनाच्या नव्या प्रयोगाला रसिकप्रेक्षक किती दाद देतात हे पाहणे महत्त्वाचे असणार आहे. या सिक्वलमध्ये ‘मनु’च्या भूमिकेसाठी ‘तनु वेड्स मनु’ चित्रपटातील अभिनेता आर.माधवन याला कायम ठेवण्यात आले आहे.