संपूर्ण जगाचे लक्ष लागून राहिलेल्या भारताच्या मंगळ मोहिमेने पहिल्याच प्रयत्नात यश संपादन केले. या घटनेची जगभरात जोरदार चर्चा सुरू असताना भारताने संपादित केलेल्या या यशाची सुतराम माहिती बॉलिवूड अभिनेत्री करीना कपूरला नसल्याचे समोर आले. एका कार्यक्रमात या विषयी विचारण्यात आलेल्या प्रश्नाला उत्तर देताना करीनाला अमंगल प्रसंगाला सामोरे जावे लागले. एकीकडे अनेक बॉलिवूड सेलिब्रिटी भारताने मिळवलेल्या या यशाचे कौतुक करीत असताना नवाब सैफ अली खानची बेगम करीना कपूर भारताने प्राप्त केलेल्या या यशाबाबत अनभिज्ञ आहे. एका केश-उत्पादनाच्या अनावरण कार्यक्रमात उपस्थित माध्यम प्रतिनिधीने करीनाला भारताच्या यशस्वी मंगळ मोहिमेविषयी विचारले असता… आपले डोळे मोठे करत हा काय प्रकार आहे, असा प्रश्नार्थक भाव तिच्या चेहऱ्यावर अवतरला. जेव्हा त्या माध्यम प्रतिनिधीने भारताच्या या मोहिमेविषयी करीनाला सविस्तर माहिती दिली, तेव्हा तिने देशासाठी ही फार मोठी घटना असल्याची प्रतिक्रिया दिली. आपल्याला कधीतरी अवकाशात जायला आवडेल, असे ती पुढे म्हणाली. सैफला बरोबर नेणार का, असे विचारले असता सैफ आधीपासूनच अवकाशात असल्याचे उत्तर तिने दिले. कधी कधी गप्प राहाण्यातच शहाणपणा असतो! हे करीनाबाईंना कोण समजावणार…