‘इश्किया’ या २०१० साली गाजलेल्या चित्रपटाचा सीक्वेल असलेल्या ‘देढ इश्किया’ या विशाल भारद्वाज निर्मित आणि अभिषेक चौबे दिग्दर्शित चित्रपटात जुनीच स्टारकास्ट दिसणार आहे. परंतु, माधुरी दीक्षित यात दिसणार असून अभिनयाबरोबरच ‘डान्सिंग क्वीन’ असलेली माधुरी या चित्रपटात मुजरा सादर करणार आहे. विशाल भारद्वाज यांचेच संगीत असलेल्या या चित्रपटातील मुजऱ्याच्या गाण्यासाठी आंतरराष्ट्रीय ख्यातीचे नृत्य दिग्दर्शक बिरजू महाराज माधुरीच्या मुजऱ्याचे नृत्यदिग्दर्शन करीत आहेत. ‘मार डाला’ या ‘देवदास’ चित्रपटातील गाजलेले गाणे आणि त्यावरचे माधुरीचे नृत्य प्रेक्षकांना प्रचंड आवडले होते. म्हणून की काय ‘मार डाला’च्या धर्तीवरचेच ‘अपने करार में’ या मुजऱ्याच्या बोलवरचे आणि साधारण त्याच चालीच्या पठडीतील चाल असलेले गाणे प्रेक्षकांसमोर येणार आहे.
लखनऊची बेगम पारा ही भूमिका माधुरी ‘देढ इश्किया’मध्ये साकारत असून नासिरुद्दीन शहासोबत ती झळकणार आहे. ‘मार डाला’ गाण्यामधील नृत्यासाठीही पं. बिरजू महाराज यांनी नृत्यदिग्दर्शन केले होते. आता पुन्हा एकदा ते माधुरीला नृत्यदिग्दर्शक म्हणून लाभले आहेत. माधुरी ही उत्तम नर्तक-अभिनेत्री असल्यामुळे नृत्यदिग्दर्शन करण्याचा आनंद आगळा आहे, असेही पं. बिरजू महाराज यांनी म्हटलेय. ‘देढ इश्किया’मध्ये नासिरुद्दीन शाह आणि अर्शद वार्सी हे ‘इश्किया’ चित्रपटातील व्यक्तिरेखाच साकारणार असून माधुरीसोबतच हुमा कुरेशी ‘देढ इश्किया’मध्ये मुख्य भूमिकेत दिसतील.
