आपल्या विनोदबुद्धीच्या जोरावर प्रेक्षकांना पोट दुखेपर्यंत हसायला लावणारी अभिनेत्री म्हणून अभिनेत्री विशाखा सुभेदारला ओळखले जाते. अवघ्या महिनाभरापूर्वी विशाखा सुभेदारने ‘महाराष्ट्राची हास्यजत्रा’ हा कार्यक्रम सोडण्याचा निर्णय घेतला. या पार्श्वभूमीवर विशाखा सुभेदारने एक पोस्ट शेअर केली होती. यात तिने ‘महाराष्ट्राची हास्यजत्रा’ हा कार्यक्रमातून निरोप घेतल्याचे तिने सांगितले होते. यानंतर ती पुढे काय करणार? असा प्रश्न उपस्थित होत होता. नुकतंच यामागचे उत्तर समोर आले आहे.
अभिनेत्री विशाखा सुभेदार हिने नुकतंच इन्स्टाग्रामवर एक पोस्ट शेअर केली आहे. या पोस्टमध्ये विशाखाने CID मालिकेत दयाची भूमिका साकारणारा अभिनेता दयानंद शेट्टीसोबतचा एक फोटो पोस्ट केला आहे. ते दोघेही लवकरच एका मराठी चित्रपटात एकत्र स्क्रीन शेअर करणार आहेत. विशाखाने हा फोटो शेअर करत दयानंद शेट्टीसोबत काम करण्याचा आनंद व्यक्त केला आहे.
विशाखाने दयानंद शेट्टीसोबतचा फोटो शेअर करत त्याला हटके कॅप्शन दिले आहे. “तोड दो ये दरवाजा, दया…#shoot #onset #setlife” असे तिने म्हटले आहे. तिच्या या फोटोत ते दोघेही एकत्र दिसत आहे. तसेच विशाखाच्या चेहऱ्यावर नवीन गोष्टी करतानाचा आनंद दिसत आहे. विशेष म्हणजे तिच्या या फोटोवर सिनेसृष्टीतील अनेक कलाकारांनी कमेंट केल्या आहेत.
तारक मेहता का उल्टा चष्मा मालिकेती अभिनेत्री सोनालिका जोशी म्हणजे माधवीने तिच्या या फोटोवर कमेंट करत “अभिनंदन” असे म्हटले आहे. तर तिच्यासोबत काम केलेल्या अभिनेता समीर चौगुले यांनी मस्तच अशी प्रतिक्रिया दिली आहे.
CID मधील दयाचे मराठी सिनेसृष्टीत पदार्पण, चित्रपटाचे नावही ठरलं
दरम्यान CID या मालिकेतून प्रसिद्धझोतात आलेला अभिनेता म्हणून दयानंद शेट्टीला ओळखले जाते. दयानंद शेट्टी याने या CID या मालिकेत दयाची भूमिका साकारली होती. या मालिकेतील ‘दया दरवाजा तोड दो’ हा डायलॉग आजही प्रेक्षकांमध्ये लोकप्रिय आहे. या मालिकेतील दया हा लवकरच एका चित्रपटाद्वारे मराठी सिनेसृष्टीत पदार्पण करणार आहे. काही दिवसांपूर्वीच या चित्रपटाचा मुहूर्त पार पडला.
नुकतंच मुहूर्त झालेल्या या चित्रपटाचे नाव ‘गरम किटली’ असे आहे. हा एक मराठी चित्रपट असणार आहे. या चित्रपटात दया एका महत्त्वपूर्ण भूमिकेत दिसणार आहे. गणेश रॅाक एन्टरटेन्मेंटच्या बॅनरखाली ‘गरम किटली’ या चित्रपटाची निर्मिती केली जात आहे. चित्रसेन नाहक आणि राजेश हे या चित्रपटाचे सहनिर्माते आहेत. या चित्रपटात दयासोबत आदित्य पैठणकर आणि श्रद्धा महाजन ही नवी जोडी प्रेक्षकांच्या भेटीला येणार आहे. त्यासोबच विजय पाटकर, अंशुमन विचारे, कमलेश सावंत, विशाखा सुभेदार, मनीषा पैठणकर, विराज गोडकर, पल्लवी पाटील अशी तगडी स्टारकास्टही या चित्रपटात दिसणार आहे.
