महाराष्ट्राला पोट धरुन हसवणा-या सोनी मराठी वरील ‘महाराष्ट्राची हास्य जत्रा’ आणि त्यामधील विनोद अतिशय चलाखीने सादर करणारे कलाकार यांनी प्रेक्षकांच्या मनात हक्काचे स्थान निर्माण केले आहे. रोजच्या व्यापातून प्रेक्षकांना थोडासा आराम मिळावा यासाठी बुधवारी आणि गुरुवारी सोनीवर या कार्यक्रमाचे आयोजन करण्यात आले आहे. या स्पर्धेची अंतिम फेरी येत्या २६ आणि २७ डिसेंबरला रंगणार आहे.
या कार्यक्रमासाठी कलाकारांची केलेली निवड ही अचूक होती. कारण या कलाकारांनी प्रत्येकवेळी कोणत्या ना कोणत्या माध्यमातून प्रेक्षकांचे मनोरंजन केले आहे, त्यांना हसवले आहे. कॉमेडी रिऍलिटी शो असणा-या ‘महाराष्ट्राची हास्यजत्रा’ मध्ये स्पर्धकांच्या चार टीम नेमण्यात आल्या होत्या. विशाखा सुभेदार, प्रसाद खांडेकर, नम्रता आवटे आणि समीर चौघुले हे चार विनोदवीर त्या चार टीमचे प्रमुख आहेत. ‘कॉमेडीचा जहागिरदार’ हा किताब मिळवण्यासाठी या चारही टीमने एकापेक्षा एक मजेशीर आणि अफलातून सादरीकरण केले. अभिनेते प्रसाद ओक आणि अभिनेत्री सई ताम्हणकर हे या शोचे परिक्षक असून त्यांनीही कलाकारांना दरवेळी दिलखुलापसपणे दाद दिली आहे.
अशा या ‘महाराष्ट्राची हास्य जत्रा’च्या टीमला आणि मनोरंजनाच्या एका तासाला निरोप देण्याची वेळ आली असली तरी या हास्यजत्रेचं दुसरं पर्व देखील लवकरच येणार आहे. या पर्वातील विजेत्या जोडीला दुस-या पर्वात डायरेक्ट संधी मिळणार असून त्यातील बाकी कलाकार मात्र गुलदस्त्यात आहे. आता ‘महाराष्ट्राची हास्य जत्रा’मध्ये ‘कॉमेडीचा जहागिरदार’ हा किताब कोण मिळवणार याकडे प्रेक्षकांचे लक्ष लागले असून अंतिम निकाल पाहण्यासाठी ‘तास भर बसा आणि पोटभर हसा’ असं म्हणणा-या ‘महाराष्ट्राची हास्य जत्रा’चा अंतिम सोहळा पाहण्यासाठी २६ आणि २७ डिसेंबरला रात्री ९ वाजता सोनी मराठी पाहावे लागणार आहे.
